影曦、靖翹、舒韻生活小誌: June 2011

Tuesday 28 June 2011

BB手語dvd- It's signing time!

之前我都有講過 BB手語,但始於我識嘅都唔多

靖翹喺學校有學開手語㗎, 佢識嘅比我多好多,我怕佢會好快唔記得,想好佢以後都會記得

於是近排買咗隻It's signing time (by singing hands)嘅DVD畀D女睇(呢種手語叫MAKATON)

我喺CBEEBIES嘅SOMETHING SPECIAL其中幾集見過佢地用一路唱兒歌,一路做手語

覺得好正,於是上網搵...見到AMAZON到,仲要全部都係五星評語,咁我就買咗啦

我一播,唔止舒韻,連靖翹同影曦都坐定定睇!佢地一路睇一路做手語

我都學識咗好多!呢隻DVD會學到好多日常會用到嘅手語

佢三個做多咗好多手語呢! 尤其係舒韻,認多咗好多動物~

早兩個月SINGING HANDS出咗第二隻DVD添!不過我諗我要消化晒呢隻DVD嘅手語先啦LOL

大家想睇下佢地嘅VIDEO,可以上YOUTUBE到搵"SINGING HANDS"就會見到㗎啦!

*有人會質疑做手語嘅BB會因為做慣咗手語而遲咗講野

如果你只係教BB手語係會可能有咁嘅情況發生

教手語嘅時候唔應該只係用手,要用口發埋音,令小朋友記得個動同發聲

到BB開始講野時,要鼓勵佢地講埋出嚟,咁BB學野就會快D㗎啦:)

koo-di BB車雨擋

我呢㗎bb車係姑奶畀嘅,佢無rain cover畀我,所以要自己買過

原本諗住買原廠嘅,但見到要成二十磅喎, 二手都要十磅@.@

於是我周圍睇...搵到呢個超正雨擋~

呢個雨擋喺"亞馬遜"到有五星評級㗎!
我睇晒REVIEWS先買㗎~好正㗎!

呢個雨擋比傳統透明膠造嘅輕~又摺得細

主要用布造,可機洗,兩邊仲有白色透氣網

仲有個可以揭起嘅窗畀bb望出去!

雨擋係用魔術貼扣住BB車嘅, 裝咗上BB車後喺背部仲有個袋口位裝野!正!

淘寶都有呢款賣呀~不過要成二百蚊人仔

可能有人會認為香港用會好焗,我反而覺得用呢個雨擋會比用膠嘅好

起碼透氣啲~同埋打風落雨一定要出街嘅話,都可以KEEP到BB乾嘛

PHONICS讀音

早陣子錄了個「英文字母正確的讀音與拼音」
今次請了女兒讀出更多phonics的讀音：）
有oo有兩個讀音，要在不同的情況下應用這些讀音~
ll唔係讀la. 讀時條脷係頂住上面門牙嘅
唔肯定讀音嘅,就仔細d聽佢讀多幾次啦!!!

大心心髮型

紥呢個心心無咩技巧,只要多幾條橡筋就紥到

1.先喺頭頂分一部份頭髮出嚟紥起佢.記住紥落少少,因為呢個係心型嘅中間位置(中間紅色橡筋)

2.然後將中間嘅辮分成一半,攞住一半拉向一邊

3.喺左右其中一邊分多一部份頭髮出嚟, 連埋中間嗰一半(2)嘅髮紥埋一齊,兩邊都係咁做(黑色橡筋)

4.喺耳仔上方分多一部分頭髮出嚟,連埋(3)嘅頭髮一齊紥起,兩邊都係咁做

5.將(4)嘅頭髮紥埋一齊. 我今次只係喺呢部份嘅頭髮紥咗扭紋辮,其實之前2,3,4紥時都可以扭紋㗎!...咁就攪店啦!

蜂巢頭加髮髻(有片)

呢個頭望落去幾高貴㗎, 去飲最啱:)

我朋友叫呢個做空姐頭...又幾啱喎!

其實呢個頭無想像中咁難,頭髮比我長少少嘅會易紥D

今次我用咗BUMPITS嚟加高個頭, 整到個BEEHIVE(蜂巢頭)

用咗BUMPITS唔洗倒梳D頭,無咁傷頭髮(唔記得提,想個BUMPITS穩陣D嘅就倒梳少少先落個BUMPITS

唔加BUMPITS都紥到,不過無咁高囉~

零亂髮髻- 一半頭髮垂下,一半做髮髻(有片)

呢個頭同之前嘅"零亂髮髻其實差唔多,不過快少少

最大分本係之前用髮夾做底,今次係用三條馬做底嚟夾起~

效果差唔多㗎!

皇冠鬢辮

呢個睇落去好難嘅鬢辮,其實唔難㗎!

只係鬢嘅時間較長(約十五分鐘)

望落去好靚㗎~

先係喺頭頂紥條馬尾,喺邊到留返D頭髮嚟鬢邊

呢條馬尾分界時唔洗太在意一定要分得靚,因為一路鬢辮時會遮住

喺其中一邊耳仔上面開始鬢(你睇到最後就會知點解要喺呢個位開始)

法式鬢辮,一路鬢一路加頭髮

右邊加嘅頭髮係喺馬尾嗰到攞小一束出嚟

要注意唔好攞太大束,如果唔係到最後會唔夠頭髮鬢㗎

一路係咁鬢...(睇下!見唔見到一路鬢,一路遮住久前分條界㗎!

鬢咗一半啦

鬢到最後馬尾無頭髮加時就普通鬢辮咁鬢埋落去.

紥咗佢之後就塞條鬢辮入去我中指指入嗰個位就攪掂!!!

想穩陣啲嘅就喺底加髮夾固定髮尾

但如果係短頭髮嘅, 可以就咁塞條髮尾入去<-呢個係喺耳仔開始鬢嘅原因!

攪掂:)

Sunday 26 June 2011

家規

好多人都問我點教到啲女咁乖

我都唔係好知點答...不過我地屋企有以下家規, 我諗咁會畀到個概念大家!

1. 唔準玩搖控,手提電話,相機等電子用品, 見到嘅話佢地會攞返畀我

2. 唔準玩門/櫃門(怕佢地夾親手/整爛道門)

3. 唔可以自己攞較剪等危險品玩/用,一定要問過我先可以攞嚟用

4. 7點放咗佢地瞓後唔可以落床(除非要去厠所), 直到6點半個GROCLOCK變色先可以落床嚟搵我

5. 7點半閙鐘響就要自己換衫/校服

6. 喺餐枱食飯, 食完要問過我先可以落地

7. 食小食要坐喺枱或廳嘅地下食(唔會周圍行整到周圍污糟晒)

8. 食完要放隻碟或碗去昇盤(舒韻都識啦!)

9. 刷牙要自己刷, 面就我幫佢地洗

10. 鞋同襪都要自己著

11. 每晚食完飯一定要執玩具, 我都會幫手~

12. 唔可以掂個電視/DVD 機, 怕會成個跌落嚟同整壞

13. 喊/埋怨一定得唔到佢地想要嘅野. 想要一樣野或想人幫手嘅,一定要有禮貌問先會得到 (Crying doesn't help!)

14. 要小朋友每餐都要食喺碟上嘅野一啖, 唔鐘意嘅野可以唔食晒,但一定要試一啖

......講住咁多先~應該仲有㗎~不過唔記得咁多LU~

入息,房屋與家用生活費之比例

好多人都對收入分配存在疑惑

啱啱睇到個網講有關入息,房屋同家用生活費嘅比例,可以畀大家參考下

房屋: 租/供樓唔應該多過入息嘅四分一

家用+生活費: 唔應該多過入息嘅三分一

*家用+生活費=食物+按揭+保險+水電煤+電話費等...

咁剩返嘅四成可以係娛樂同儲錢:)

當然呢個只係一個ROUGH GUIDE~參考下好啦~

買鞋的學問

呢張相係舒韻買第一對鞋時影曦嘅相(十個月大)

嗰時啱啱開始行~
佢地好好服務,仲影埋呢張相SEND去EMAIL我到添! (唔知香港有無啲咁嘅服務啦!)

英國人好重視小朋友嘅鞋, 覺得隨便買對會著壞腳.
十歲以下小朋友嘅腳仲未成形㗎, 所以買鞋時一定要小朋友親身去試
因為有啲款唔同,鞋嘅大小闊度都唔同, 所以唔可以只係跟住尺碼買~

我所有朋友嘅BB都係喺CLARKS到買第一對鞋㗎!

CLARKS嘅童鞋分幾種, 有種就係腳底嘅軟膠伸延到鞋頭到嘅,係專係畀學爬嘅BB著嘅

著咗後等佢地爬時啜到個地多D,又唔隻腳仔

不過通常佢地都係趁BB學行或識行先買鞋

當日我地去咗CLARKS嘅專門店,有專人同佢地度腳嘅大細,仲會度埋隻腳嘅闊度
個個BB對腳嘅厚度都唔同,所以唔可以只係睇對腳嘅大細嚟買.
最窄嘅係D,最闊嘅係H
E.G.影曦第一對鞋係 F,靖翹係G,舒韻都係F
但係佢地一路大, 腳嘅濶度都仲會有變, 影曦嘅而家係E, 靖翹係F!
而且唔建議著二手鞋. 因為小朋友著新鞋時,鞋會就住小朋友腳嘅形狀而變形
著二手鞋嘅即係對鞋唔會"perfectly fit"小朋友嘅腳,咁又會著壞鞋

CLARKS嘅鞋係貴啲,但係係物有所值嘅!我D女嘅鞋全部都係喺CLARKS買.
佢地著嘅衫全部都係二手衫, 但鞋就一定要新嘅!

之前我都試過去DR. KONG到買,但佢地只係度大細,亞女著咗之後隻鞋鬆泡泡...真係好差!!!

東涌有間CLARKS OUTLET,童鞋會平D,但係就成日斷碼~

Friday 24 June 2011

鬢辮髮髻+絲帶籃

影曦學校SPORTS DAY,我為藍社嘅佢紥咗呢個頭

真係勁遠都望到佢!正!

佢紥咗呢個頭返學,激多人讚

其實好簡單:)

1.紥條馬尾先

2.將馬尾分為三份,鬢咗辮佢

3.用條鬢辮互相扭曲成髻,落髮夾固定(多頭髮嘅小朋友個髻會大好多,好睇好多!

4.喺髻對落個位插絲帶落頭髮到, 好似織籃咁織,圍住髮聐加絲帶

5.織咗一個圈後向外咁繼續織...織咗幾個圈後(隨你鐘意)就可打上蝴蝶姞~

*呢條絲帶比較粗,所以唔係好睇到個"籃"嘅圖案

用較幼嘅絲帶織,個"籃"會突出D㗎!

古典美髮型

朋友結婚,所以化行咗個妝,個頭都SET到行晒LOL

其實呢個頭用咗7分鐘左右攪掂~唔難SET㗎!

1.先喺前陰鬢咗條法式鬢辮先,再拉鬆D條辮,咁條鬢辮會大條D好睇D

2.之後加一條有頭圍咁大嘅橡筋喺個頭到(到頭笠落去就得,唔洗扯返頭髮出嚟),今次我用咗有藍色蝴蝶結嘅橡筋

3.連埋條鬢辮將頭髮SIB入橡筋到,用髮夾固定位置咁就攪掂!!!

我就鐘意留一束頭髮喺側邊,但係你可以夾埋上去都得:)

係咪好快手呢~呢個頭去飲最啱!!!

滕籃髮式

呢種滕籃髮型望落去好靚...如困你多頭髮嘅話!

影曦嘅頭髮太薄,做唔到預期效果

不過都講下點做,因為我相信大部份人嘅頭髮都係多過佢㗎!

開始時先喺頭頂攞咗兩束頭髮出嚟,分別用橡筋箍住,然後紥半條馬尾

頭頂兩束頭髮就係咁㗎啦

我見人用髮針整嘅,不過我無,用呢個TOPSY TAIL都OK

拆開頭頂嘅一束頭髮, 攞起最前面嘅一束頭髮,穿入圈內

髮圈尖嗰個位插入頭髮,開始織起

就係咁織啦(哈!無錯,佢係玩緊DS先會坐得咁定LOL)

織完就係咁㗎啦!

另一邊又係咁織~攪掂!

可愛髮型

靖翹好少頭髮,又薄喎,初初以為同佢乜都紥唔到...

佢見到影曦日日都紥唔同嘅辮,佢又想紥,所以就試咗呢個髮型

要用上大量橡筋,但效果好好,佢超鐘意! 返學佢勁畀人讚靚

放學時仲猛咁同我講唔該晒我幫佢紥辮~傻妹~

1.先喺頭頂部份分五份,用橡筋紥好

2.中間嗰條分開一半,加隔離條辮嘅一半然後紥起. 如是者其他都係咁紥

3.左右各分多一部份頭髮,加埋上面絷嘅辮一齊紥起

4.再左右兩邊加埋剩低嘅頭髮紥起攪掂啦~

快速零亂髮髻(有片)

幫朋友個女SET呢個髮髻

佢地睇住我SET,睇到嘩嘩聲! 因為實在太簡單! 記住睇片啦!

佢比較多頭髮,好易就SET到啦

影曦比較小頭髮,要佢之前個晚紥住孖辮瞓,等D頭髮曲先做到咁嘅效果!

望落去幾多頭髮! (製造錯覺成功!)

條片喺到:)

法式鬢孖辮加絲帶

呢個係法式鬢辮嘅變化

法式鬢辮通常都係左右兩邊一跟織一路加頭髮

但呢個就只係加一邊

紥右邊時只係喺右邊加頭髮,咁條鬢辮會有一邊突起

紥左邊時只係左邊加頭髮,咁又係會有一邊突起

突起嗰部分方便穿上絲帶

好似鞋帶咁穿起佢就攪掂啦:)

法式扭紋辮做頭箍(有片)

呢個法式扭紋辮,都幾易紥,三分鐘左右就攪掂!

幾有古典味㗎~

金朋友紥都好好睇!

相中嘅係鬢咗扭紋辮後,後面嘅頭髮再SET起咗

片中嘅只係做到頭箍~

Tuesday 21 June 2011

Sit and Stand BB孖車

呢BB種車叫Sit and stand stroller. (係tandem 前後車嚟㗎)

係畀一大一細或孖B坐嘅. 呢種BB車好就好在可以推晒兩個,大B企又得,坐又得,又可以隨時落地喎~

唔好處係...大B無位瞓囉...

Joovy同Baby Trend 係兩隻比較出名做呢BB種車嘅牌子.

前面個位適合畀個6 月至45磅嘅幼兒坐

後面個位就畀2.5歲至45磅嘅小朋友坐.

JOOVY嘅車較重, 最輕嘅ULTRALIGHT都有26磅, 而BABY TREND嘅就輕少少

不過睇見用家用後感, JOOVY嘅評分較BABYTRND嘅好:)

後面呢個位可以畀大啲嘅小朋友坐

或者企...

後面仲可以放CARSEAT (前面都放得㗎)

仲有呢㗎就畀一個大B同一對孖B坐

又或者好似我咁...有三個相隔唔係好遠嘅小朋友用都得

不過你都見啦...㗎車都幾長下㗎!

我介紹下, JUST FOR FUN:P

要睇詳細啲嘅REVIEWS,去呢到睇下啦~可以睇架車摺埋有幾細:)

呢架車MOTHERCARE有得賣㗎(唔知幾錢)

淘寶就賣緊800幾蚊人仔+運費(搵以上呢兩個嘅牌子名就搵到)

我見過YAHOO拍賣都有㗎(叫兄弟車), 有啲樓上鋪都有得賣, 會比淘寶貴少少,但就唔洗同人交涉運費㗎啲囉~

我都好想買返㗎, 但係我已經有好多BB車啦:(

Monday 20 June 2011

BUGGY BOARD/ POD/ BIKE

如果你有兩個年齡相近嘅幼兒, 大嗰個又唔想行, 但又唔想買孖車嘅...有無考慮買BUGGY BOARD呢?

BUGGY BOAD喺外國好流行. 我喺香港都見過,不過唔多人用

介紹下先~

BUGGY BOAD其係一個牌子, 不過而家就泛指可以扣喺BB車後畀大啲嘅小朋友做踏板, 咁佢地唔攰可以踏上去唔洗行

BUGGY BOARD本身自己有個網頁,可以畀CHECK你下你自己嘅BB車啱唔啱用,扣唔扣到上去. 唔用嘅時候有條帶可以釣起塊板. 好處係可以畀到大嗰個小朋友企, 唔好處係推時可能因為有塊板喺你前面,行時會頂住頂住咁, 上"駁"時都有可能會頂住,要喺踏板上嘅小朋友落地先可以上到駁.

BUGGY BOARD(約30-50磅)...仲有好多牌子可以揀

BUGGY BOARD仲有好多種, 近期新出嘅仲有埋個位㗎

以下呢款係LITAF出嘅 "SEAT TO GO" (約40磅)

同埋"PICK UP" (約70磅)

除非你BB車嘅推車位長或你對手比較長,如果唔係推起嚟真係幾唔就腳

BUGGY BIKE

我朋友有一架...我覺得好正! 小朋友一定鐘!同埋唔會好似上種面嗰幾BUGGY BOARD咁推車時行得咁辛苦

不過都幾貴下...仲貴過上淘寶買架孖車呀!(約港幣一千蚊啦)

另外呢種叫BUGGY POD (BY REVELO), 可以加喺仔本身嘅BB車到,好似變咗孖車咁,而且摺埋好細下添! 到見AMAZON佢嘅REVIEW幾好㗎

不過又係貴囉...又係港幣成千蚊先買到!

Sunday 19 June 2011

Baby Door Bouncer

呢個BABY BOUCER其實喺外國流行咗好多年, 但係好多香港人都唔知佢嘅存在, 而且喺香港比較難搵同埋貴

呢個BOUNCER可以畀BB跳跳跳, 練下腳力:) 對BB爬同行都有幫助㗎!
我以前成日用佢...放BB喺BOUNCER彈彈彈, 我就邊睇住佢,邊做家務~
BB可以企起身周圍望,唔洗整日瞓喺到, 係好好嘅運動!BB好鐘意㗎:)
先講下點用...

成個BOUNCER係咁嘅樣嘅...

上面個夾夾喺門框到㗎

下面就係畀BB嘅"坐位"

夾住個門枉就係咁嘅樣㗎啦

BABY BOUNCER有好多隻牌子, 其實都大同小異嘅. 有D個坐位就大D, 有D個款花巧D...

但係大致都係咁嘅...

BB條頸夠力抬到個頭就可以用(穩陣起見...3個月...但我D女就2個月大用都OK)
個坐位拆得出嚟洗嘅(因為呢個時期嘅BB仲係易嘔奶LOL個坐位可放入洗E機洗)
坐位嘅高度可調較
可承受12公斤(26磅)...BB大約歲幾啦
使用嘅門框至少要有1.5CM濶, 牆嘅厚度喺10CM至17CM之間(4-.75吋)

用嘅時候大人要在場. 如果唔係BB彈彈下可能個頭會撞到門框. 初初玩時BB畀玩約15分鐘就夠. 我試過畀D女玩45分鐘都OK...佢地試過彈彈下瞓著咗添㗎LOL (幾個月大嘅BB如果唔肯瞓覺,畀佢玩BOUCER可以玩到佢地攰~會好瞓D㗎~)

通常BB識坐識爬(6-9個月)就會對玩BOUNCER嘅興趣少咗. 大家想買嘅要考慮下BB可以玩到幾耐, 抵唔抵買呢?

英國買約20幾磅, 折咗港幣300幾蚊到啦~
我記得香港嘅mothercare有得賣,不過要訂貨...成個星期先返到貨, 仲要成600-700蚊港幣-.-
我未見過玩具反斗城有得賣
見過淘寶有,都係二百蚊左右,幾抵買㗎!大家可以考慮下!

創意產品-親子自行車

喺英國都住咗一段時間, 見過好多唔同嘅創意育兒產品. 有D真係令你嘩然㗎!
(我未見過人用㗎, 只係知道有呢bb種車嘅存在啫...我覺得澳洲同美國用會適合d,英國d路無咁闊!)
打響頭炮嘅係呢㗎創意產品-親子自行車
呢㗎係單車, 又係BB車!
一齊嚟睇睇相啦~

畀孖B/一大一細

畀初生BB嘅（maxi cosi嘅car seat）

呢個一定好玩~但係小朋友瞓唔到覺

single

single -進入室內，只要將把手反轉過來，就變成了BB車，去商場買野、餵BB食野都好方便呀

我搵到呢個牌子嘅BB車啦~
youtube:
http://www.youtube.com/watch?v=irImU9LU6ew&feature=related
http://www.youtube.com/watch?v=cdzKnW2noVI

website:
http://www.tagabikes.com/options.asp

喺美國賣約港幣萬一蚊左右

而呢到又有另一款...