RICE PUDDING

RICE PUDDING　係英國家傳戶曉嘅甜品，大人細路都鐘意食㗎:)
口感有啲似粥，但係甜㗎囉
多數人會係熱食，但我係少數人，我鐘意凍食:P
夏天食凍嘅，冬天食熱嘅都好正！
喺超級市場都有一杯杯（好似乳酪咁大杯）賣㗎
就係因為咁，所以好少人會自己喺屋企整嚟食
不過因為香港賣得貴...我老公同啲女又鐘意食，所以我就自己整囉！
方法同材料都好簡單~喺屋企隨時都整到！
材料：
米　　　　　3/4杯
牛奶　　　　2杯
砂糖　　　　1/3杯
鹽　　　　　1/4茶匙
蛋　　　　　1隻
牛油　　　　3茶匙
呍呢嗱香油　1/2茶匙（可加可唔加）
*英國人有賣專係整rice pudding嘅米㗎，不過個人嚟講，用咩米都無所謂，分別唔太大：p

先係煮熟啲米（我自己鐘意睇火煮飯，快好多㗎！不過當然你可以用電飯煲）


加入牛奶1.5杯（仲有半杯等陣加）、糖同鹽，中火煮15-20分鐘直到佢杰杰地

加入剩餘嘅奶同打咗嘅蛋，牛油同呍呢嗱香油，煮多２分鐘就攪掂~

煮完之後啲米唔係好夠綿（可能用珍珠米會綿啲），所以我放咗啲rice pudding落個真空煲到焗個幾鐘
焗完之後啲米就綿好多，但就好杰好似一pat咁lol
如果有咁嘅情況，加返少少水再煮下佢就ok~仍然係咁好味㗎！

星媽

最近女兒們幫一公司拍了一catalog硬照，靖翹又拍了一個拍玩具車片，朋友就開始叫我星媽
我對這個名詞有啲點不安
只係小小幾個job,她們談不上是什麽童星
我家裡沒有專業相機，能夠做模特兒讓別人拍下她們可愛一面，實很難得（算是免費的專業攝影罷！）
做模特兒又可以讓她們嘗試不同的玩意
做模特兒雖然好，但我們不時每個工作都會接
我跟先生都談過她們做小模特兒的條件，要付合了才會接job
1.　不影響日常上課，絕不會因為要工作而請假。要她們知道準時上課的重要
2.　不影響她們的生活習慣。太晚拍的工作不會接
3.　她們不願意做的，我們要有抽身離去的準備，要敢為孩子說不。

藉此，她們慢慢學懂了工作和金錢的關係
她們知道要工作，才能有金錢買食物。
她們賺到的都會存到各自的戶口（未開，但我有記數:P）
儲到一定數目她們可以自己選擇購買喜歡的東西

這就是生活
人就是要工作才能生存
她們雖小，也開始明白父親辛苦工作的原因
我猜這不是壞事吧！

後記：
我帶了影曦逛逛，她買了一條裙，一個頭箍，一對髮飾和24對筷子！
女兒們穿的衣服，都是她們表姐的舊衣服（雖然是舊，但仍很新淨:）
我有年多沒有買過新衣給她們了。
我告訴妹妹，影曦買了一條裙子，她說影曦不久之前曾告訴她，她想買新衣
現在她用自己膁回來的錢買自己喜歡的裙子，她特別的珍惜
至於24對筷子...她著我要寄回英國給她的同學，她不想被忘記...

至於靖翹，她買了一個頭箍，一件背心，一套Hello Kitty皇冠首飾
回到家中，她開了那套首飾的包裝，舒韻就問她可不可以戴...
她二話不說，就給舒韻戴上了HK皇冠
她就是那麽愛分享！

Halloween trick or treat的危險

呢篇野其實上年已經想寫，但係上年真係無咩心寫:P
萬聖節喺外國過，大家一定以為會好好氣氛嗎？
trick or treat其實係美國人玩多，英國無咁多人玩
美國可能好多人都會裝飾自己嘅花園成graveyard, 呢方面英國人較為「內儉」跖會做到咁出面
整個jack o lantern，貼兩個貼紙喺窗已經好夠
同朋友傾計嘅時候，大家都不約而同咁講點避免去trick or treat
我覺得好奇怪，咁好玩嘅野，點解要怕？
聽佢地講講下，真係覺得佢地有佢地嘅道理...
大家都知英國時不時都有拐帶案，家長們都會教定小朋友唔好同陌生人講野
徧徧就喺萬聖節，你就帶小朋友去鼓勵佢地同陌生人講要，要人畀糖佢，咁唔係畀咗一個錯誤嘅訊息佢咩？
當小朋友認識咗一啲危險嘅陌生人，佢地向小朋友埋手嘅機會有增加，令佢地警戒心減低
父母一走漏眼，小朋友就可以就咁唔見咗...
我６２９９都好唔鐘意trick or treat，除咗宗教問題，亦因為年青人嘅行為問題。
因為佢地係教督徒，佢地唔會慶祝萬聖節，所以唔會派糖
有次有啲十幾歲嘅𡃁仔因為佢地無開門畀糖佢地，佢地就掉雞蛋落佢地嘅窗到
又打爛佢地車嘅檔風玻璃
無錯！trick or treat係會間接鼓勵佢地嘅不良行為㗎！
想萬聖節玩得開心又放心？
大家可以自己安排萬聖節扮野派對，減少小朋友同陌生人接觸嘅機會
大家亦可以同小朋友嘅朋友仔媽咪安排好，trick or treat只係去呢幾個朋友屋企
咁大家又可以trick or treat，又唔會miss out all the fun:)
一句講晒，大家安全為上！萬聖節玩得開心啲呀！！！

英國的校服

嗱嗱嗱~都話我仲有好多關於英國嘅野都未寫㗎啦啦隊長我返到嚟都仲有排寫呀!
今次想講下英國嘅小學校服。大部份學校校服無分夏季冬季，全年都係著呢套
基本上呢到學校嘅校服全部都係一樣-一件POLO恤+短裙／連身裙／褲／格仔連身裙，平日想著邊樣係由得你，唔似香港咁咁多限制，款式都好唔同㗎！
你睇下下面三條短裙都係唔同款㗎
有啲款仲會有少少繡花，令校服無咁死氣沉沉
而且校服好平！！！唔洗經校服商買，喺超市，馬莎等百貨公司都買到。好似POLO恤咁，約HKD＄45有3件，短裙HKD＄30有一條！喺香港要成99蚊一條呢！
呢到每間學校都有"學校顏色"-軍綠，寶藍，紅，啡...所有校服都係POLO恤加短裙／連身裙／褲+學校顏色嘅冷衫就得！夏天時仲可以著學校顏色嘅格仔連身裙（無影到出嚟添！）綠色係影曦學校顏色，佢夏天就可以著綠色白色嘅格仔連身裙啦！处天時D冷衫全部都喺百貨公司有得賣，都係買返學校顏色。而校褸唔一定要買，絶大部份嘅小朋友都係著返自己（咩色都得）～如果香港嘅學校校服都係咁簡單就好囉！
 至於私校，就會好似香港咁要向校服商訂校服，貴好多好多㗎！

值得欣賞嘅係佢地注重學生嘅軟件（佢地喺學校學到嘅野），而唔係校服呢嘅咁表面嘅野。同時佢地都會明白小朋友需要，畀小朋友著自己嘅褸唔會凍親佢地
我知香港學校都會畀小朋友著自己褸，但係一定要降到某個溫度先可以...
好記得以前日日出門口都要睇晒新聞ｃｈｅｃｋ下幾多度先睇下可唔可以著褲，真係好鬼煩！
香港嘅學校真係太多規舉，真係想講句：於鬆嘅啦！香港人！

另外，英國嘅小朋友每日都係著校服返學放學，上ＰＥ堂時係要去換ＰＥ衫㗎！
所以佢地由４歲開始就會一定識自己著衫著襪著鞋著褲，唔會好似啲港童咁要工人同佢著
呢點其實都好重要
好多人都會想自己小朋友自理能力好啲，但徧徧換校服時就要假手於人，唔能夠自己做到－連我嘅女都係！
佢地套校服啲鈕喺後面嘅，你叫得幾歲嘅佢地點扣呢？
每次換校服，除校服都要人幫！真係呢...
希望為香港學校設計校服嘅設計師能夠考慮埋呢點,等小朋友可以自己換校~XXX
突然好掛住英國添:(

二十個月的舒韻

實在太耐太耐無update湊舒韻記啦！
太忙啦太忙啦~
呢個幾月發生好多事~先係由英國搬返香港，再喺香港搬多次去而家住緊嘅地方...然後就係開學啦！
咁大嘅轉變，舒韻都適應得好好~無咩點扭計！
（除咗佢病時啦！）
你睇佢幾鬼馬！

真係不能不笑LOL


cheeky Echo好鐘意扮鬼扮馬~戴咗影曦嘅帽同攞住個袋入嚟廚房畀我睇！

我煮緊飯時佢自己著到咁... wahahahaha!
wings + a garland + a top



身手愈嚟愈敏捷...連呢個都爬到！

呢啲橋自己行都得


好鐘意塗鴉！啲色仲要幾靚添！


搬咗嚟去過幾次海灘，由初初怕沙到而家會自己走去踢浪！
傻妹！

 

嚟咗香港之後，我同啲女講多咗中文，舒韻都開始明多咗
佢講野唔係咁叻（成日見到喺fb啲人話佢地小朋友講咗乜講咗乜），相對嚟講佢就比嗰啲小朋友慢
不過佢發音好咗好多，想我幫手都會叫"mama help"，畀完野佢又會講thank you
今日同影曦認緊中文字時好多字佢都跟到家姐嘅讀音喎！真係好可愛:)
我唔會擔心佢講野慢~相信佢一開始講，就會好似佢兩個家姐咁講到收唔到聲lol
好啦~遲啲再講啦！

 

yahoo blog upgrade咗啦!

尋晚喺亞妹點醒我下...終於upgrade咗呢個blog
最好嘅一點係...我可以喺我部ipod到覆留言！以後我可以快少少覆大家嘅留言！
background等之類嘅所碎野我遲啲先執囉！
不過最衰我貪快，無backup舊blog嘅「自定欄位」，之前寫欄位都無晒:(
不過唔緊要啦~遲啲先慢慢執！

之前有blog友話呢個版面唔好用
我都係啱啱先轉，未知咁多住
不過我覺得...每一次facebook轉版都畀人插話舊版好用啲...
我覺得其實改野唔係唔好，係好多人都唔鐘意改變，因為要重新適應啫
改版呢啲時唔到我地呢啲小blogger話事，予其投拆，不如努力適應

講開又講，facebook個app upgrade咗後ok好用，但係可惜嘅係無咗"bookmark"嘅功能:(

名校小一面試

相信有睇開我blog嘅朋友都知我唔係好重小朋友係咪讀名校
但今年因為老公係一c校教，係EMI學校，同埋呢間係離屋企最近嘅小學嘅關係，影曦報咗名去考呢間小學
一入到去...真係覺得自己格格不入
個個小朋友都著到好似去飲咁，有啲老c同我講，有啲女仔嘅裙要成千幾二千蚊一條@.@
有啲男仔仲打晒bow tie!
學校出面泊滿名車，個個都身光頸靚，好誇！

每個父母好想自己嘅小朋友表現出眾...
仲要報埋面試班
奈何，唔係個個小朋友都係咁...
當日...見到有小朋友鬧情緒大喊，有個喊之餘佢媽咪仲打佢媽咪...有啲搶人顏色，有個仲咬人...
嗰日坐喺到睇住影曦油顏色，佢靜靜咁坐係到油。我喺到諗，點解我會畀個女去interview？一個五歲嘅人仔要經歷啲咁面試？我咁做係啱㗎嘛？
...聽天尤命...一切唔需要太過著緊
考唔到咪讀第間~無咩所謂，我只希望佢讀得開心！
xxxxxxxxx

兩個女兒

早陣子有朋友再度懷孕（恭喜恭喜！），佢第一個係女，當我問到呢胎係仔定女時，佢皺一皺眉話...又係女嚟㗎！

我係過來人，我又點會唔知嗰種感受！

記得當我知道靖翹係女時，我都有少少失望，覺得...我又要重覆做住同影曦一樣嘅野咁照顧佢

後來...佢出世後我就有著唔同嘅觀點

佢地兩個雖然有住我同我先生嘅基因，但係性格同行為都好唔同！

影曦好文靜多野諗，靖翹較活潑外向同多野講

學野嘅進程又唔同

睇住佢地嘅相處佢地互相產生化學作用！真係好有趣！

雖然兩個都係女，但係地係兩個唔同嘅人，處事方式都唔同~

無論係生男定女都好，佢地都係兩個唔同嘅人

唔好因為性別而失望~佢地都係自己嘅小朋友，真係仔女都無所謂

而家諗返，真係覺得嗰時失望好傻！

當我再次懷孕時，都已經唔再諗舒韻係咩性別

能夠有小朋友已經係一種幸福

好多人都會問我...你會唔會追返個仔呀？

我唔會因為想追仔而生

想生多個嘅就生，唔會係因小朋友性別而生

曾經見過幾多人想追另一個性別嘅小朋友而生...

生唔到想要嘅性別又失望，又有壓力，亦對將要出世嘅小朋友唔公平

當呢個生命嚟到呢個世界，畀佢知道父母「唔想要佢」，佢會有幾難受？

一個生命唔係賭注，抱住興奮嘅心情嚟迎接新生命，唔係更好咩？