影相

唔知大有無發覺...香港人係狂影相既呢?

每次去親小朋友既生日會,都會有一大堆家長攞咗專業相機係咁影

一個生日會可以影幾百相,之後會一次過post晒上網

我自己都鐘意影相,但不至於咁瘋狂

原因?因為喺英國生活過,你就會知點解...

英國人好重視知識產權同肖像權

喺呢到會較難買到冒牌野(好事嚟架!)

而影野都係一樣

喺影曦同靖翹入學,學校畀咗一份授權+同意書我簽

仲畀咗一份警方發既有關相片用途既信我

內容係問佢地可唔可以同小朋友影相,影完既相可唔可以用,用嚟做乜等等....

話說呢到都幾多戀童辟既人-.-有d時候呢d人會上網收集小朋友既片用嚟...

總之就嘔心啦!

仲有有d人會帶走小朋友...以前有幾單野就係因為有人叫出小朋友個名,個小朋友畀人帶走咗...姦殺咗...

所以就算學校用你小朋友既相嚟做學校宣傳等既野,都唔會註明小朋友叫咩名

以免呢類人知到小朋友讀咩學校,叫咩名,輕易搵到佢地後就以帶走佢地

喺呢方面,我不得不佩服英國人既細心(但同時都會有少少擔心...)

嚟到英國之後,我無提過我自己住邊

就算post我女既相上嚟,都搵唔到我(哈!)

但同時,我都盡少post其他小朋友既相上嚟

就算post,都唔係好見到樣既

真係要好小心,以免畀人告-.-(未必真係會畀人告,係我怕啫)

其實我好想影影曦學校既野畀大家睇架,但係因以上種種因,我決定唔影

所以之前都係趁影曦課室無人先影

希望大家明白!

好多英國人都鐘意享受過程多於影相留念

好多時我係唔敢攞部相機出嚟影呢!

我以前成日去迪士尼,好多人都會影我d女

有d有禮貌既,會問咗先,有d問都唔問,會偷影

不過如果畀我見到既,我都會一一拒絕(初初係好難開口架,但慣咗之後你就會理直氣壯咁叫人唔好!)

呢個係我老公定既界線,你永遠唔會知d人用d相嚟做乜!

(試過有個人影舒韻,我話唔好影啦唔該,仲要話come on, just one photo! 係咁求我.我好堅決咁拒絕咗.我都講到明話唔好影嗰個仲要咁厚面皮同我講數-.-呢個男人雖然有自己小朋友,但仲係咁影人地既小朋友...居心何在?!)

(仲有次我老公捉到個男人喺個泳池到影相,係其中一個小朋友既daddy嚟架!無耐之後佢畀人捉咗,發現佢係戀童辟,仲喺佢電腦搵到兒童色情照!你話恐唔恐佈!)

我喺facebook upload既相,全部都上晒鎖,要係我friend list既人先睇得

同埋我唔會post d女既泳衣照同裸照出嚟,大家明點解啦!

喺呢到我都想同大家講句...網路世界乜人都有,大家都要小心處理小朋友既相片

尤其是人地小朋友既相呀!