我屋企好亂？！

其實都係突然有感而發啫...

前排同朋友出街食飯，我咪叫佢地得閒上嚟我屋企玩囉

跟住有個fd話：不過你屋企咁亂

我O晒咀！

佢嚟得我屋企一次

仲要係我個女開party前，d玩具攞晒出嚟準備攞落會所

廚房梗係亂，我同老公自己整野食整咗食朝﹣４０幾人嘅野食喎！

嗰時屋企梗係亂！

我嗰時仲要未搬屋，間屋細d，迫d...

佢都成年無上過嚟我屋企就一口咬定話我屋企亂

我聽到真係唔知幾躁...

佢自己出嚟做緊野

屋企有亞媽做家務

屋企又無細路喎

有咩g格咁話我？

我一個全職媽媽，睇住兩個細，平時唔會只係做家務㗎嘛！

我都要用d時間嚟同兩個女玩，嚟教佢地野㗎

講到我好似做到好唔稱職咁

幾星期前又有個fd上嚟我屋企

我屋企執得都幾整齊

除咗個主人房

因為佢嚟前幾日有生日會，咪執晒廳d什物入主人房囉

咁畀d小朋友多d位玩嘛

跟住佢話：嘩！你間房仲亂過我搬屋時

吓...點可以咁比...你自己有亞媽幫你手睇女，你可以專心執野

我呢d食自己㗎咋

向來都唔靠人嘅

我老公平時都唔會幫手做家務㗎啦

只係識倒亂@.@

叫佢行兩步放d污糟衫入主人房嘅洗e籃都唔會做，成日除完衫都掉落地下！

自己煮完野食唔會洗

佢d「玩具」周圍放

主人房個窗台由我地搬入嚟咁耐，佢d玩具就放喺到咁耐！！！

我叫咗好幾次清下佢

答完我係，又無咗件事

我唔會怪我老公喺屋企唔做野

佢出去做野都好辛苦

呢d野我自己密密做就算

而且好就好在老公從來唔會批評屋企有幾亂（因為大部份都係佢攪出嚟嘅...hehe）

有時我好攰好攰，佢都會出聲叫我唔好執，無咩所謂

所以有間唔中都好放縱，好幾日都唔會執屋

但徧徧就係d唔理解我屋企運作嘅人多野講

我都唔想諗太多

唔想因此而唔開心

只係希望我身邊嘅朋友會明白，無論點都好...

負面嘅批評除咗唔會對成件事有幫助之外，只有傷害到身邊嘅人

而且...對你地更加無影響

咁點解你地要作出咁樣嘅批評呢？