工人=無私隱？

早幾日喺某個網頁到見到有個媽咪話要求喺屋企裝web cam觀察小朋友，同時睇埋個工人平日點做野

個工人喊晒口咁話唔得，話要quit

個媽咪就話好激氣

我係第一個留言嘅

我認為各人都有私隱

畀著係我，如果我老闆一日廿四小時用web cam check住晒你你都躁啦

我就覺得個工人唔想老闆裝web cam嘅要求唔算過份喎

點知之後嘅留言都係講...

幫個媽咪，話個賓妹唔啱，佢地自己屋企都有裝咁

仲有個媽咪話「咩叫做唔準啊？」

我心諗...人地都係打工啫

雖然佢地職位係叫工人，但係都係人嚟㗎嘛

人人都有私隱㗎

有d人真係以為錢係大晒...佢打工嘅，就一文不值

人地都好慘㗎...辛辛苦苦離鄉別井都係想喺鄉下嘅屋企人生活好過d啫

佢地至少一年先可見得屋企人一次...

我覺得你請得人，就要相信佢嘅能力

以心、以禮待人，咁人地先會用心咁幫你做家務，幫你湊小朋友

我作為一個全職媽媽，心知喺屋企湊小朋友同做家務分分鐘比出去打工更難

你請人返嚟幫你哽咗份難頂嘅工，仲要剝奪人地私隱

之後仲要大大聲聲喺網上面話個工人唔啱...仲要有咁多人撐佢...呢d咩世界嚟㗎？

香港人點解會變到咁㗎...我真係好唔明！

P.S.如果你地屋企有裝，但係你地嘅工人接受到，我覺得ok無問題（最好就係簽約前講定！）

我明白有d工人知道d家長喺出面做野，所以想裝web cam睇住小朋友，所以唔抗拒。

人地明白事理，願意畀你侵犯私隱咁畀呢d家長以web cam睇下小朋友

但相反點解香港人唔明白工人佢地嘅私隱，人地唔肯畀你侵犯私隱，反而要話人地唔啱呢？

我覺得工人有權話唔裝，就唔應該話個工人唔啱囉！