最近喺電視到睇到幾樣野...令我對香港電視好無信心
懇請各家長留意自己小朋友睇緊咩電視／電影（就算係兒童台，都唔係成日啱細路睇㗎！）
1.我擺明平時係絕少睇無記
點解？一睇就覺得自己IQ低咗...劇情返炒再返炒...
最近仲有套Janet Bin,我睇到毛管楝>.<
一見到要即刻轉台...
2.唔止無記，總之中港台日韓劇我都無睇...
自從畀我老公洗腦後，我先意識到自己被呢D劇集"熏陶"到不知所謂
例子一
兩夫婦鬧交，個女嘅就帶小朋友走返娘家
我自小因為睇得電視多，以為咁係理所當然
但而家先知...咁係幾咁幼稚！
兩個大人喺小朋友面前鬧，好影響小朋友嘅心理
佢地可能會行為異常
個媽咪帶埋小朋友走，更加令小朋友覺得逃避係啱嘅
（較好嘅處理方法係，等小朋友瞓咗（減低對小朋友嘅影響），兩公婆傾啱佢為止。鬧係無用㗎，記住係傾！唔好咁激動，激動對整件事係無幫助㗎！大不了，大落街冷靜下再傾過。而唔係郁d就話要返娘家！）
當然見到d咁嘅劇情，都同返小朋友講，鬧交係唔啱，咁走咗去都係唔啱㗎！
例子二
情侶鬧交，無論係邊個錯都好，一定係男嘅氹返女
嗱嗱嗱！港女咁咪咁出嚟㗎囉！
見到咁嘅情況，記住同小朋友講，邊個做錯就邊個認錯！
（某情度上，我覺得呢d係中國文化。但係係唔好嘅文化...唔應該保存...）
3.我屋企長期開住HBO之類嘅NOW台，我成日都會聽到人用英文爆粗！我唔明呢d刻集／電影，係點過廣管局㗎囉！！！
大部份時間，F-word cut 晒，但係比F-word仲要粗口嘅CXXT，係完全無cut!
仲有ballxxks,dxxk之類嘅粗口...只係cut個F-word有咩用？？？
4.有次上左朋友屋企，佢地睇真情
嗰集咁啱就係講靜川畀人追，靜川爬出窗逃走，之後畀人扑頭...墮樓
呢d咁嘅場面...安排係兩點播...唉...
你話我點敢畀D女睇無記呀
5.諗住畀亞女喺屋企睇崖上之波兒
見到I級，諗住實得啦
好彩嗰次陪住亞女睇咋！
我先可以從旁指導
有一場係講宗介攞住載住波兒個桶去河邊，有人叫佢都扮聽唔到，一直照去
波兒跌咗落河，宗介即刻落水諗住救返波兒...同時間，水開始漲，宗介愈行愈深...
好彩有個大人捉返宗介上嚟先無事
如果一個三歲嘅細路，遇到個咁嘅情況，我諗佢都會好似宗介咁落水！
好彩我同D女一齊睇，可以同佢地講到唔可以人地叫你都唔理，扮聽唔到
唔可以自己走落水...
只係短短嘅５分鐘，呢兩樣野已經可以足以令小朋友學壞
我唔係誇張呀...記得老公同我講過，child play2喺英國禁播（當年好似係IIb，但係有d家長唔理，照畀小朋友睇），就係因為曾經發生過有兩個分別８歲同１０歲嘅小朋友，喺超市帶走咗個歲半嘅BB去間廢屋，然後用石好似電影劇情咁擲死咗個BB
你會估，１０歲嘅細路應該會懂事啦？！原來唔係㗎...
5.我老公有個習慣，就係畀d女睇戲前，佢盡量都會睇過先
帶D女去戲院睇戲前，有可能嘅話，佢都會自己睇咗一次先，之後先會帶佢地去睇
可能你會覺得咁好傻，但我覺得佢好細心
記得batman﹣the dark knight出時，佢見過有大人帶個５歲嘅細路入場睇
佢都O晒咀...
你地聽到我咁保護D女，梗係以為佢地好細膽
我兩個女其實要比同齡嘅小朋友大膽得多！
就係因為佢地知道電視嘅野唔係真，唔會模枋，所以唔會驚
佢地完全唔怕黑
睇到D我地以為佢地會驚嘅野，佢地反而只會一笑置之~仲話我地傻，嗰d係假嘅，唔係真㗎！
No comments:
Post a Comment