我都買過兩年迪士尼門票，次次去我都想用最少嘅時間排隊玩最多嘅野
所以玩轉迪士尼，我都叫幾有經驗㗎！
主題公園每年都有旺淡季之分
暑假、聖誔、新年、復活、五一勞動、十一黃金周前後、十月（萬聖節），例必熟旺季，呢啲日子就要預咗排隊啦
淡季乃九月剛開學（因為大多數人暑假去咗，九月就會相對少好多人），十一月（因為好多人都趁萬聖節玩咗）、三月頭（過咗農曆新年）、四月尾（過咗復活節）、五六月就快考試同考緊試時。呢啲時間都會相對少人。
另外，三號風、黃雨、落雨天，迪士尼都會較少人㗎，你唔介意淋下雨嘅，呢啲日子入園玩，人龍真係少啲㗎！而個晏晝嘅parade就會變咗好短，三卡車載住卡通人物同你揮揮手就走咗~不過我呢啲成日入園嘅（當年...），睇少一次半次parade唔會介意啦！
時間嚟講，梗係十點一開園就入去啦！
自由行嘅人通常係lunch後先入園，咁就避開咗嗰啲人潮
一入到園就先攞咗節目時間表同地圖，表演時間日日都唔同，有時因為節日而加開特別表演，所以要睇定Golden Mickeys、獅子王慶典、巡遊等你想䏲嘅節目係幾點先
預早十五分鐘(多人嘅話甚至半個鐘）去排隊
喺未夠鐘睇呢啲表演前，就可以玩咗較熱門、好多人玩嘅野，因為一入去人流唔多，排隊唔洗好耐就玩到
而巴斯光年星際歷險、飛越太空山、小熊維尼歷險之旅都有fast pass, 大家都可以先去咗攞，到指定時間時返去，就會排條好短嘅隊就玩到呢三樣嘅其中一樣。fast pass只可以喺同一時間攞一次張，只要喺呢三樣機動遊外嘅fast pass機插入你嘅門票就會攞到
你揀咗睇邊場嘅中間時間位，就玩機動遊戲、見公主、同迪士尼人物影下相咁
Lunch最好早啲食，十一點至十一點半時食就差唔多。一嚟餐廳無咩人，啲侍應反應快啲，上菜又快啲，又可避開lunch time等位嘅人潮，唔會浪費咗啲時間喺排隊到
到啲人夠鐘食lunch時佢地衝晒去食野，咁機動遊戲又會少咗人排隊啦！
通常三點半就係parade, 想影靚相嘅，真係要早半個鐘去攞個靚位
但如果好似我咁，只但求係咁二睇到，咁十五分鐘前去搵落腳點都ok㗎
但係如果你較遲入到園嘅，建議你搭火車去咗幻想世界先，由嗰邊玩起，人會較少
好啦，講咗咁耐
試下應用下先！
以以下呢日為例
10：00入園~玩呀！（先去攞fast pass）建議先去明日世界~其中一段時間要見公主（無計，我個女次次都要見！）
11：15食lunch，之後就去探險世界
12：00睇獅子王慶典（約半小時）
12：45睇米奇金獎音樂劇（未必趕到，趕唔到就睇下面備註）
1：30左右出到嚟，應該好多人仲食緊lunch,你就可以去玩多啲機動遊戲
3：00搵位睇parade
4：00肚餓嘅話就要醫醫個肚XD
4：30自由行嘅人開始走~繼續玩機動遊戲
天開始暗，去迷離莊園或探險世界都好好feel
跟住就去灰熊山谷、玩斗奇兵大本營玩
最後8點就睇煙花~（記住預早半個鐘去搵靚位！）
備註：如果12：45趕唔切去睇Golden Mickeys,大家可以先去玩
到3點parade搵位時就企去Golden Mickeys門口，因為呢個位係最快睇完parade而又最近Golden Mickeys,一睇完就可以飛去排隊睇4點嗰場~
如果嗰日好晒，就可以集中睇show、去小小世界、米奇幻想曲、迷離莊園、小熊維尼歷險之旅、飛越太空山、幸會史迪仔呢啲地方，排隊嘅地方都無咁熱，有啲仲有冷氣添！
大家玩得開心啲啦！
***********
以前大女讀幼稚園時，我地不時放咗學都會去轉迪士尼㗎！
連公主們都認得佢地、記得佢地叫咩名！
a kiss for Willow!
有一次更有幸被Cinderella 選中，同佢一齊坐木馬呢！
Magical moment@disneyland-同Cinderella一齊坐旋轉木馬
三年後，我地喺blogger 活動上，又撞到呢位公主
佢仲問我二女去咗邊呢！
No comments:
Post a Comment