感動點

最近發生了幾件小事，令我好感動...

 

有一日，影曦放學返嚟同我講，佢跳繩嘅手柄位（木嚟㗎）爛咗，問我可唔可以整返。我問佢點整爛㗎？佢話：「我借咗畀同學玩，佢整爛咗，不過佢唔係有心㗎，係意外嚟㗎，媽媽你可唔可以幫我黐返好呀？」跳繩爛咗，佢無喊，無話要買過條，同學整爛咗佢仲怕我會責怪佢同學，幫佢講好說話~影曦真係好乖！！！

 

靖翹放學返嚟，有個貼紙喺件衫到，我問佢個貼紙點得嚟㗎？佢話佢答啱問題、幫老師（之類嗰啲），「原本我有兩個㗎，不過我畀咗一個XXX同學，因為我想佢開心呀嘛！」「我書包仲有啲糖呀，一粒畀影曦，一粒畀舒韻㗎！」...咁你呢...「唔洗㗎啦，我想同佢地分享呀！」靖翹都好乖呀...

 

我搵到一個Aurora公仔，係靖翹嘅兩歲生日禮物。佢見到後，佢話：「我想送畀舒韻呀！」「但係係你嘅special toy嚟㗎喎！」「唔緊要啦！我有Lily嘛！舒韻無一個可以換衫嘅公仔呀！」跟住佢就送咗個公仔畀妹妹啦！

 

更感動嘅係喺尋日發生...原本靖翹被邀請去一個生日會，我同佢一齊畫咗張生日咭，包好禮物，但因為塞車同要趕住去婚禮，老公帶唔到佢去佢期待咗個多星期嘅生日會（我有啲失望）...佢知道佢去唔到後，佢無喊，無扭，佢仲同daddy講“I did want to go to the party but it doesn't matter, it's not your fault daddy and anyway there will be other parties that I can go to.”跟住佢仲攬住daddy同錫咗佢一啖，同daddy講話多謝佢帶佢出街！佢地真係好生性，好聽話！雖然只係好小嘅事，但就令我覺得佢地真係好識諗，好明白事理，佢地都長大啦！我地為佢地而驕傲！！！