影曦返學啦

影曦終於都返學啦

由於佢係１２月出世

其實佢上年己經可以返學

但係我地都覺得遲一年畀佢返會好d，佢會係大仔，吸收同適應力都比較強

而且，我地都覺得佢仲細，無謂咁早畀佢返學啦

畀佢玩多一年，享受下童年嘛！

一開始返學就十幾年㗎啦

第時佢可能返到唔想返添呢！

梗係畀佢玩多年好啦！

呢一年我自己喺屋企都教咗佢好多野，唔洗一定返學先學到野嘅

三歲嘅佢識砌６０塊嘅砌圖（其實兩歲半己經識，不過之後玩厭咗）

識數到５０，認到數字

識計２０以內嘅加減數

認到少少中文字（佢自己個名呀之類）

認英文字佢就唔係好叻啦，我都無刻意谷佢，因為我諗佢返學都會學到㗎啦~（反而亞妹識得多過佢！）

油顏色唔出界

識用刀同較剪

識溝色（如紅加白變粉紅...）

呢期教佢睇星圖，佢仲識認到大熊座，英仙座，天鵝座，獵戶座等等呢！

雖然比起學咩baby can read嗰d bb，我個女都唔算識得多野

但係我覺得佢嘅想像力同創作力好好

有時見到dBB兩歲識睇書好勁好勁，媽咪一定要好有恒心去教先得！

但係講真兩歲嘅bb識睇識讀但其實唔識解d字嘅

我覺得有少少跳步。

我紿終都係覺得等小朋友有相當嘅理解力先學睇書比較合邏輯

我認為今年先畀佢入學嘅決定真係無錯㗎

佢平時都係２４小時跟住我，得我一個湊，但佢都好獨立~

佢返學無喊過，我無陪過佢返學添（其實可以，不過我覺得佢ok）

無喊嘅原因？

1.早喺佢足三歲時，畀佢參加芭蕾舞班，畀佢知道上完堂，媽咪同亞妹會嚟接返佢嘅

（其實佢上第一堂時好怪，只係企喺角落頭，到想join時先行出嚟！但第二堂佢知發生緊咩事，就好正常啦）

2.因為佢夠大個先返學，明嘅野會多d，自然會接受返學係件好嘅事

3.我喺佢返學前做足心理輔導，話佢佢知佢會著咩，喺學校會發生咩事，老師又會點...

4.畀佢參與準備返學嘅野，令佢投入。返學前都會去學校門口睇下，等佢有期待

5.入到學校，唔會提喊呢野樣，周圍指下有咩exciting things，分散注意力

6.到我要走時，我會同佢講"have fun today!""放學我就會同亞妹嚟接返你㗎啦！"之後kiss and cuddle。等佢知道返學係件有趣嘅事，我地想佢have fun~

本來諗住同影曦正正經經影返張校服相

點知靖翹見到我攞住部相機，慢慢咁喺鏡頭嘅右邊攝咗入鏡

影曦一見到佢就攬住佢影~

喺樓下見到stephaine同justine
我地一齊手搭shuttle bus-佢地好似搭校車咁！

返到學校，要坐定定玩~

放學啦
我地一齊去接佢地

體育衫

喺𨋢到影曦，又攬到亞妹實一實

一話影相靖翹就側晒頭，影曦就攝晒位^.^
呢兩個人真攪笑！