春天嚟緊啦~路邊的小花

當看到這些路邊小花萌芽開花

你就會知道,寒冬將離我們而去:)

這些小花, 圍著這棵樹而長

紫的,黃的,白的都有:)

 

這種白色小花叫SNOWDROP, 剛開花時小花都是倒吊的,真係美極了!

可是我錯過了其開花最美的時間...這些SNOWDROP都開始凋謝

 

融入英國生活

你有試過聽住喺外國嘅朋友呻悶嗎?成日都會話掛住香港...老實講,香港人去到外國生活,成日都會以香港生活作比較,成日都會想做返喺香港做嘅野,食嘅野,想喺外國過住香港嘅生活.對比之下,呢到嘅生活當然無香港咁多采多姿,但係其實仲有好多野,未被香港人發掘咋!外國人有佢地自己嘅生活方式,佢地唔似香港人咁可以成日行夜街,唱K,食飯呀咁. 佢地日都會去PUB飲野, 請人返屋企食飯 (dinner party), 一齊去睇戲,碌LANE呀咁.仲有好多人鐘意做運動㗎! 我識好幾個我年紀嘅朋友每個星期都會去打波踢波(我遲D得閒講下英國嘅運動~同香港好唔同㗎!),個做運動風氣好好多:) 佢地有D好似香港嘅業餘運動協會(如足球,GOLF, CRICKET,曲棍球,草地滾球...)佢地係會畀JOIN錢呢D會,每星期都有練習,有時要打比賽咁㗎~

喺呢到做媽咪,勁多支援㗎喎! 生前喺E院有ANTENATAL GROUP(呢到嗰D唔同香港嗰D㗎!約10 pairs人一齊上, 好容易識到人~), 生完後健康院又會有POST NATAL/ BREAST FEEDING GROUP, MUMS & BABIES一齊上, 全部嘅人都係住喺附近~ 我生完影曦都有去到, 個GROUP完咗後我地自組去各人屋企玩. 我地而家仲有聯絡㗎! 有D小朋友仲讀埋同一間學校添㗎:)

喺英國住嘅媽咪,想識多D人嘅,不妨去下LOCAL嘅TODDLER GROUP(www.netmums.com 可以輸入POST CODE嚟搵自己LOCAL嘅活動㗎!).佢地每星期都有聚會, 收磅半至兩磅㗎咋.有茶有餅食呀咁.喺D LOCAL嘅CHILDREN CENTRE又有好多免費 COURSE上,好似BB手語呀咁.圖書館又有BABY BOUNCE & RHYME咁,會同BB唱歌仔呀咁. 識多咗人, 就得閒約出去公園玩, 又或者去人地屋企玩. 主動D嘅,請人返去你屋企玩先囉!咁樣慢慢就會識到好多人!我都係搬咗嚟呢頭半年啫,出街都已經成日撞到識嘅人啦:)

另外, 如果你小朋友返咗學嘅, 試下早少少帶小朋友返學, 放學後又留喺學校一陣畀小朋友同其他小朋友玩.呢間你可以喺操場識到好多媽咪~ 學校有PTA嘅又去參加埋...總之就即極參與, 令自己享受及融入英國嘅生活.

記得第一次離開香港隨夫搬嚟英國,嗰時乜人都唔識,終人喺屋企發MO,攪到自己好唔開心! 又唔知自己幾時可以返香港喎, 又無得上網, 攪到自己好寂寞...今次再搬返嚟英國,我同自己講,唔可以再呢埋,要MAKE THE BEST OF IT! 我覺得,既然嚟到外國生活,就應該發掘多D外國人會做嘅野,而唔係去尋找返自己以前嘅生活.太懷念過去只會令自己嘅思鄉病更嚴重. 希望大家住喺外國嘅朋友,都會積極融入當地生活啦~xxx

單車樂

喺HK,如果你有單車嘅,都只會喺附近踩

但係喺到呢,好多人都會帶D單車去公園或海邊等地方踩㗎

佢地會買個架,放喺車頂,又或者買個放喺車尾嘅架嚟裝單車

踩一個圈就返屋企咁~好爽!

 

結霜

新NETBOOK到手:)

答應咗大家會寫多D BLOG,就寫呢篇先啦

D相其實係十一月影㗎啦!

嗰時係返嚟英國後第一次結霜

我係咁影相...D人梗係以為我傻㗎啦!

喺香港,D人一見凍就上大霧山睇霜

呢到...周街都係!

呢排凍,成日朝早都會結霜㗎

其實結霜都好煩,揸車嘅話又要用多個零字去幫架車溶冰

D路又零捨滑...好危險!

我呢D行人都要小心D呀!

好啦~睇相啦!

圍住葉邊結嘅霜

結咗霜嘅草地+ WILLOW TREE:) +太陽伯伯

夜晚成個草地結晒霜

太陽出嚟霜開始溶

未畀太陽晒到,就未溶~

見到個天無雲嗎?

唔講唔知...天清(晴)嘅話係會凍過陰天同落雨㗎

喺HK成日以為落雨會凍D...

我62以前教地理㗎

佢話如果陰天嘅話,會困住D熱氣,所以會暖D,但萬里無雲嘅話D熱就會散晒,會凍D㗎!

 

喺英國睇醫生

upload唔到相...咁就等我打多d唔洗相既blog啦

喺英國住既話,嚟到好緊要要做既事就係去附近既clinic登記!

National Health Service (NHS)似hk既醫管局咁(上nhs既網頁到搵邊個clinic近你)

基本上有咩問題上NHS既網頁都會答到

登記時唔需要任何身份證明文件(我都覺得奇怪...但我就咁填咗張FORM就上咗佢地個SYSTEM! 英國係無身份證架!要證明身份,就要用PASSPORT/車牌)

GP = General Practice 係你既家庭醫生, 以後你既一家都會係跟呢個醫生

0-16歲(唔記得係16定18)既人睇醫生同攞葯+睇牙醫都係唔洗錢既

有咗bb到bb出世後一年睇醫生同攞葯+睇牙醫又係唔洗錢既,仲有好似65歲以上都係有呢個福利

所以我嚟咗英國咁多年,咁耐...睇咗咁多次醫生,一次錢都未畀過!

一般要睇醫生既話,就要畀6磅幾(無記錯既話)

呢到睇醫生全部都係要預約架(打電話去clinic到book)

而且佢地好重時間,好少人會遲到架!因為睇醫生都係正苦錢,book間又無到即係浪費公帑!

呢到好少好少人睇私家架,我無一個朋友係睇私家,同香港真係好唔同呢!

睇得私家既,真係要好有好有米既人先會睇架!

我喺英國生咗兩胎,兩胎都係正苦生,服務好好:)好過香港好多!

我遲d打篇有關香港同英國生bb既分別畀大家睇下:)

好啦...登記咗GP後,佢地會主動聯絡HEALTH VISITORS

health visitors係會跟進0-5歲既小朋友成長,會畀一紅簿仔你記錄小朋友既生長歷程

如果bb喺英國出世,health visitor會喺你出院後幾日內去你屋企睇你,有d好既health visitors會幫你做少少家務,幫輕下你呢(我聽返嚟架咋!)

係新手媽咪既,佢地會喺bb出世後連續幾日都會嚟睇你.睇下你餵奶,bb瞓覺各方面有無問題.無既話之後就要你自己帶bb返健康院做檢查啦

如果小朋友啱啱先嚟英國,登記咗後,health visitor都會聯絡你,會安排小朋友補打返無打既針(英國同香港打既針係有少少唔同架),夠歲數仲會安排check up

如果你係好似我之前咁大住個肚嚟英國既話,登記完咗會有midwife聯絡你,同你做各種產前檢查.喺英國懷孕其間無咩問題既,佢地只會照兩次超聲波, 一次喺10 星期,第二次喺20星期(可以測埋bb性別) midwife好多產前資訊你,包括一本nhs講懷孕過程既書同產前班,產前yoga班等等.

我產前參加咗midwife攪既產前班,識到一班準媽咪

產後參加咗health visitor攪既breastfeeding group(喺英國絕大部份既人都係餵母乳,同hk真係差好遠好遠!我識十幾個媽咪,只有兩個係餵奶粉!),又識到一班媽咪.我地到而家仲有見面架!

我覺得呢到睇e生可靠好多呢!唔似hk d c+咁成日要你返去覆診!>.<

英國的小學(影曦的學校)

英國既學年係9月計起

英國教育制度（小學）喺分為三個stages㗎。

Foundation Stage - Nursery & Reception

Key Stage 1 - Year 1 & Year 2

Key Stage 2 - Year 3 to Year 6

有啲小學會附設nursery，有啲無。

有啲叫Primary School，係由Reception至Year 6嘅

有啲分Infant School 同 Junior School

Infant School由Reception至Year 2, 讀完Year 2 (Key Stage 1)就要轉校到Junior School繼續Key Stage 2嘅課程

不過好似現在新的小學都會喺Primary School。(以上資料由網友hihi提供,唔該晒!)

year r 入學時要滿4歲

靖翹8月出世,即係靖翹下年9月就可以返year r,會係佢班最細嗰堆

喺呢到,無得揀做大仔定細仔,夠歲數既,一定要入嗰年!

英國既小學一般都要小朋友住喺區內,私校當然除外啦!

入表時只可以揀屋企附近既學校,只有三個志願

所以住邊好影響小朋友入邊間學校(好似香港既校網制咁)

例如key stage1會包括學加減數,times table同歷史等等...只要喺呢幾年間學晒d野就ok,老師都會用課本既.基本課程會跟住一本,仲有幾本係附助既,咁就畀咗好大空間老師發揮佢地既宇宙,令課堂更有趣!

小朋友會年都會考一次評估,但係好多時小朋友都係唔知自己考緊架

呢個分係用嚟評估學校既級別,對小朋友無影響既

到小朋友7歲時,佢地會有個全國性既評估考試

11歲時有個時叫11plus

11plus唔硬性小朋友一定要考既

由於英國既中學有文法同非文法中學之分

想入文法中學既,就要pass 11plus

11plus分幾科考(詳情我唔係太清楚,因為我仲未經歷過!)

之後所分配到既中學會依分數,志願同學校<->屋企既距離而定

由電腦計算出嚟架

(有錯請更正!)

英國既學校都會經過ofsted,好似係學校質素評估咁上下既野

想知間學校好唔好,就上網下學校既ofsted好唔好啦!

英國既學校有d有宗教背景,有d無架

影曦呢間有架,連住間church架,大時大節小朋友都會過去church到做崇拜(見到間church嘛?)

呢個係影曦學校既操場, net ball team喺到練波架(net ball喺英國既小學好興架!下次等我講下英國既sports時再提下啦)

英國既小學成日都會有playgroup畀小朋友玩架

草地畀小朋友練足球

見唔見到喺足球場後又有個playarea呀?後面仲有d樹,成個森林咁架!

影曦叫嗰到做woods架!

影曦既課室

周圍既野都好能夠刺激小朋友各方面既發展

左邊有book corner,小朋友可以坐喺bean bags上揀書睇

右上角嗰個係role play area,有d bb喺到啦,仲有好多唔同既衫畀小朋友試著嚟玩角式扮演

又有個creation station,每朝返到學校,都會有唔同既野喺台面畀小朋友玩(沙,冰,積木...)

課室連廁所

每日返到學校,影曦都會掛好件褸同放好書包喺右邊既勾到

英國既小朋友唔會著體育衫返學,佢地會帶返學校換架!

你見到右邊掛住嗰d就係pe袋啦

佢地體育當通常都會著黑色鞋帶(有少少似我地細個時著既白飯魚咁,不過佢地著嗰d靚d架,喺clarks到賣4.5磅左右,唔會著壞小朋友腳架)

英國的學前教育-nursery / pre-school

英國既小朋友夠兩歲就可返nursery,兩歲後幾時開始返都得架

家長可以揀畀小朋友一個星期返幾多日

有d小朋友好似靖翹咁日日都返,有d只會返一日

夠三歲既話英國正苦係會貼錢畀小朋友返一個星期

佢地只係返朝早三個鐘架咋

好多local既nursery固定既校園

佢地通常都係駐喺village hall或者一d小學,中學既school hall到

雖然佢地無固定校園,但佢地都有幾多資源架

好似靖翹學咁,佢地學校既"老師"會setup晒個village hall

日日都會放d唔同既玩具出嚟,分好晒一個個section.

佢地返nuesery真係玩架咋,完全無要大家坐喺到用課本教野

小朋友通常一入到去就玩,玩咗陣就會大家圍圈點名,唱下歌

之後又玩...食茶點(茶點只會提供生果,多得jamie oliver,而家英國所有學校都主張health eating啦!)

然後畀小朋友出出面花園玩下單車,種下野...

跟住大家圍圈講個故仔唱下歌,咁就夠鐘等家長嚟湊走

聽落好似好求其,但係佢地好有計劃,我真係幾impressed架!

(呢間學校好多好細微既野佢地都會注意到.佢會請我去學校同小朋友講個中文故仔,畀小朋友知道呢個世界有好多種語言;又叫我用中文寫d"你好,椅子"等既野,畀靖翹得閒望下,令我覺得有參與其中)

nursery都有私校架...不過又係貴囉...

甲蟲

平時成日急急腳咁湊兩個返學...

今日湊完兩個返學同舒韻慢步走,先發覺原來周圍都係甲蟲!

數一數,喺短短既回家路上,有成廿幾隻喎!

Citizens Advice Bureau

今日去咗一轉CAB (要book appointment去架)

英國有好多福利可以攞

只要有小朋友係16歲以下既,都可以claim child benefit

第一個小朋友有20磅左右,第二個打後就每個13磅(每星期計)

仲有好多benefit可以攞架,但係因為我先生唔喺到住,我又同6299住...所以我唔知仲有咩可以攞,咪走去同佢地講我既情況,問問仲有無得攞囉

資料係絶對保密架.

個職員好細心咁幫我睇晒所有福利...結果我係除咗child benefit外就乜都claim唔到

唔緊要...唯有盡---量洗少d啦!

(呢到既職員都係義工嚟架!如果你啱啱搬嚟英國乜都唔知既,佢地會幫到你架!)

 

Fun Fair

喺英國,間唔中都會有呢d fun fair架

有d係每年都有既,有d就間唔中有既

呢個係每年都有架

我係經過下咋

日頭太早未開

run呢d fun fair既係一間公司

有好多架大貨櫃車,一開出嚟就係機動遊戲! very clever!!!

喺呢個fun fair做野既人都會隨團住,有少少似馬戲團咁

on site有好多caravans 同motorhomes

呢日我帶咗靖翹去呢個公園,見到d到做野既人啱啱起身呢

佢地係咁周圍遊,圍住英國咁周圍走

其實都幾攰...所謂既屋企都係喺架車到

當然有d人係會意呢種生活,但係有咗家庭後,呢種生活就對小朋友唔係咁好啦(我見到onsite有小朋友住架) 

松子

而家係秋天,周圍都係松子呀!隨地都會執到

松鼠喺呢個時候經常出沒架!

英國的秋天

英國人成日都會講天氣

皆因呢到日頭同夜晚天氣變化可以好大

日頭以好大雨,但轉個頭個天就好清!

英國既秋天對於我呢個住慣hk既人嚟講比較凍>.<

好多英國人仲著緊短袖,但我會忍唔住著羽絨!真係笑大人個口

(好彩大嗰兩個女都唔怕凍,而家都成日著短袖!)

英國既秋天同冬天都好濕,所以雨褸同水鞋係必需品

普遍既英國人都會覺得"some dirt won't do any harm"

所以佢地好多時都鼓勵小朋友get messy-例如...踩水氹

佢地覺得小朋友應該做小朋友鐘意做既事

記得我細個時都好鐘意踩水氹,但就成日都會畀大人喝止,話污糟

呢到既人反而唔會咁諗

有時仲會專登趁落雨天,同小朋友著好雨褸同水鞋出去搵水氹踩

唔會因落雨怕濕而唔出街

我地屋企都有規定,一定要咗水鞋先可以踩水氹!

死火,講講下唔知講咗去邊!

好啦,入返正題

呢到既四季都明顯

一到秋天,好多樹都會變咗紅,橙,啡...

呢張相係我三年前喺英國住時既

呢段路我行過無數次

秋天呢個時候有好多松鼠周圍執松子架!

好多時秋天同冬天個天都好清架

我62話,無雲既日子會比有雲既凍d架!因為有雲既話可以困住熱氣,溫度會高d

估下咩嚟既?

呢個果子叫conker,喺呢頭周圍係架

62話佢細個無咩野玩,秋天時個個都會執conker,用string紥住,兩個人會互相fing string 上既conker,兩粒conker互相撞擊,邊個跌咗既就輸!呢種遊戲而家己經無人玩啦!

英國生活,由此開始

好多謝大家支持!以後我會更有心機講講我喺英國既有趣事

呢篇係第一篇

不如講下我點嚟咗英國生活先啦

話說我自細都想喺外國生活,但係只係去過美國同加拿大,未去過歐洲

我自己都估唔到自己會嫁個英國人

我嚟英國前我對英國係一無知既,以為英國同美國係差唔多

但原來係好唔同架!!!(遲d會詳細講)

當年結咗婚後十日就飛咗嚟英國同6299一齊住

(我一路都喺hk,未試過喺外國讀書架)

嗰時一住就住咗兩年半...

喺英國,同6299同住既情況唔咁常見架

佢地好講求私隱,仔女大咗都會主動搬出去住

呢到都幾重稅架,但係福利好,退休金多,所以老人家老咗都唔洗仔女供養

同香港既情況真係好唔同!

同6299住既日子唔難過,佢志仲教識咗我好多野

99教咗我好多湊小朋友既技巧,62講咗好多以前英國係點既野畀我聽(好有趣架!有時間再同大家分享)

...講住咁多先

遲d再講過!

好天的秋天:)

難得咁好天,影返靚相先!

呢到係我地既後花園:)

d顏色好靚呀!