申請入學時，老師同主任都建議，不如坐校車啦！
對於一個湊三個嘅我嚟講，兩個女搭校車真係方便好多
但係我老公話唔好
初初我都覺得好唔gur，但係諗落佢講嘅野真係好有道理
佢話，我親自接送嘅，可以同佢老師傾多啲計，講多啲有關小朋友當日上課情況呀咁
「你打電話嚟搵老師傾都得㗎」
無錯係得，但係可以接到小朋友放學，見到接佢放學時嘅反應都好重要
小朋友有咩喺學校唔開心，於學時可以即刻表現到，家長就可以即刻問老師發生咩事
小朋友喺學校唔開心，坐校車時可能又會唔開心，到返到屋企家長先發覺小朋友唔開心可能會令個問題嚴重咗
而且小朋友喺校車畀人蝦你又未必知
小朋友仲細，好多野好快佢地就唔記得
有時我問啲女今日喺學校做咗啲咩呀？答案係...唔記得咗！
去接佢放學你又可以知道今日學咗咩（問老師！）
仲有就係可以識小朋友嘅同學仔。有時小朋友返到屋企就會話...今日同咗邊個邊個玩
小朋友坐校車嘅話，你會比較難去知佢講緊邊個
去接佢放學可以叫佢指下畀你睇佢啲好朋友仔:)
又可以識到其他家長喎~
好似今日咁...我送完兩個女返學就同咗幾個同學仔嘅媽咪傾小一選校嘅野
我初嚟報到，又唔熟環境，梗係問下佢地意見好！
有時放咗學我又會同老師係咁傾兩個女上堂嘅情況
因為呢間始終係新學校，佢地咩人都唔識，都想知道佢地識朋友嘅情況嘅
傾傾下老c就會講好多課堂嘅小事畀你聽...
e.g.老c以為影曦唔識聽中文，老c問佢，佢又識答（佢真係唔明嘅話佢又唔怕醜會問㗎喎），問問下...原來影曦已經唔聲唔聲記晒所有同學嘅名!
老師話影曦跟唔到中文筆劃，佢隔離嘅同學主動幫佢:)到個同學唔識寫英文字，佢又會主動教人寫喎~
老c叫靖翹試飲茶時，佢唔肯試，仲要流咗一滴眼淚出嚟！之後終於飲咗啖。跟住叫佢試月餅（佢超唔鐘意食㗎！），佢都肯試咗一少啖，今次無喊...
呢啲咁嘅小事，真係要日日同啲老師接觸先會知。我都會同返老師講佢地嘅背景，令佢地更了解佢地:) 真係多得老公嘅提醒，先可以明白咁多"自行接送"嘅好處！搭校車係方便，但係我以後盡可能都會自己接送呀！（可能到小學先坐校車啦~）
妳老公講得好啱又對女兒好細心，辛苦妳啦！不過我知妳唔怕辛苦的。
ReplyDelete[版主回覆10/01/2011 22:02:00]其實我怕㗎，不過要頂硬上 我呻嘅話，啲女又呻 見到住呢到個個都有車出入 真係心思思想考牌買車 如果老公繼續喺到做，舒韻又入埋嗰間幼稚園，我仲要咁送佢地返學５年呀！諗起真係有少少depressed T.T
絶對認同呀!
ReplyDelete[版主回覆10/01/2011 22:02:00]多謝多謝！
我都認為好應該咁做，真係提醒咗我。
ReplyDelete[版主回覆10/01/2011 22:04:00]我都係被提醒嗰個lol
有些家長是因為沒時間才安排自己仔女乘坐校車往來學校(當然也有一些家長覺得接送仔女麻煩不願做才這樣做)，可以的話家長親自接送當然是最好的做法，原因如你上文所言。 我唸小一初期是乘坐校車上下學的，在校車遇到一位很頑皮經常欺負我的學生，有一次校車抵達我住所附近而我準備下車時，父親看見我被那位學生欺負，旋即教訓該名學生並跟校車職員理論，之後他再沒有欺負我，可是我不甘受欺負，之後數次在校車裡主動推撞他，如何處理已忘記，只肯定我做過有關行為後沒有被他的家長指責，只在車內息事寧人……當然事後想起這樣做是不對的。 沒多久後不再坐校車，直至小六也由父親接送我來回學校。記得快不再坐校車前數天我還在校車裡開心的說不用再坐校車了，校車職員看見我這樣子是不會高興的(少了人坐校車收入少了)，可當時無知的我卻不會想到這些。 不好意思扯開了話題，希望她們開心的度過幼稚園生活，我希望看見她們畢業的一刻。
ReplyDelete[版主回覆10/01/2011 22:10:00]好多謝你嘅分享！ 你令我更加覺得喺我能力範圍內，我應該自己接送小朋友返學... 下年如果影曦入到我啱啱同佢報嗰間小一，就一定要搭校車啦 因為一來一回都一個鐘，我唔會夠時間接送靖翹返學放學 希望唔會有不愉快事件發生！
家長和老師能作多些交流,也是一件好事....
ReplyDelete[版主回覆10/01/2011 22:12:00]係㗎係㗎:) 放學後我成日同啲老c傾到興起，會請埋我同啲女入學校個indoor playground玩，舒韻不知幾開心！ 老c又會見到佢地平時同姐妹相處係點:)對佢地了解又多啲，真係好事嚟㗎！
" 你令我更加覺得喺我能力範圍內，我應該自己接送小朋友返學..." 我本身性格較容易被人欺負，或許你的三名女兒不會像我這樣呢……當然希望她們 他日乘坐校車時不會遇上 不愉快事件。
ReplyDelete[版主回覆10/03/2011 23:46:00]我啲女係畀人蝦都唔知lol