唔知大家細個時玩乜野多嘅呢？
我雖然細個住市區，但係一到週末同長假期，我都會去到從前住錦田嘅外公外婆家到住。我喺嗰到過咗好多個暑假。
我同亞妹細個會周田走，去鄰居屋企玩，同村嘅人都知我地係邊個（我係大妹豬，亞妹係細妹豬～客家人係咁叫㗎），每次見到佢地都會寒喧幾句，真係好懷念嗰份人情味！
暑假每日黃昏四、五點時，住隔鄰嘅小朋友都會互相叫對方個名，然後大家就會喺村口集合一齊玩！我地會玩埋舟、狐狸先生幾多點、玩捉迷藏、踩腳、跳橡筋繩、紅綠燈、數字球、猜皇帝⋯其中令我感受最深，係我教啲女玩埋舟。
影曦啱啱上小一時，我地住喺小學宿舍。我地不時都會落樓下踩單車，同住宿舍嘅小朋友玩。我教啲女玩埋舟。因為嗰時舒韻仲細唔識玩，所以我都要玩埋一份㗎！感覺就好似回到小時候、回到我地嗰個年代，喺村口玩嘅日子！我當然係跑得最快，成日都埋到舟啦！哈哈！啲女成日問我點解我咁叻成日贏，我同佢地講，玩多啲嘅話，佢地都會知道竅門！我地玩玩下，跟住住喺周圍嘅小朋友都會一齊玩呢！
放學後，學校裡面仍然會有啲等緊下班校車嘅同學，影曦都有教埋佢地點玩，大家又一齊玩！
幾日之後，我見到小息時有同學開始玩埋舟，仲愈嚟愈多人玩呢！而家去到公園，啲女成日都拉住我玩埋舟㗎！
而家呢代嘅小朋友，經常玩電子遊戲，ipad，手機，個個都做晒低頭族，同我地嗰個年代嘅小朋友真係好唔同。同小朋友玩多啲呢啲經典遊戲，既可增進親子關係，又可藉此識多啲朋友仔，改善小朋友溝通同表達技巧，學識待人接物。而最重要嘅，係你同佢玩經典遊戲嘅呢個回憶，係你畀佢一世嘅禮物!
好玩嘅野，真係唔好畀佢停！要薪火相傳，一代傳一代咁落去!
影曦舒韻同佢地嘅姨丈玩埋舟！
緊張又刺激！
埋舟啦！跑呀！
估下佢地玩緊乜？
What's the time, Mr Wolf?
狐狸先生幾多點？
英國都好流行嘅playground game嚟㗎！
No comments:
Post a Comment