期待的幸福

前幾日朋友同我講，佢兩個小朋友成日爭ipad玩（5歲半／１歲半）
於是就買多咗部畀兩個小朋友
無錯，係一人一部ipad!
佢地嘅行為不得不令我咋舌
問題一）兩個爭野？咁買多一部囉...點解唔係教小朋友，要大家分享？
問題二）點解會畀兩個年紀尚小嘅小朋友玩ipad? (５歲我都覺得ok，但歲半???）
問題三）小朋友會懂珍惜嗎？

我家裡，一部ipad都無。有係好，但唔係必需（老公諗住結婚周年紀念先買，當係我地互送畀對方嘅禮物）。
對於兩個年紀咁細嘅小朋友嚟講，一人一部，係咪奢侈咗少少？
再者，重要嘅唔係錢嘅問題，係佢地解決兩個小朋友爭野嘅方法

在此，我有一個小小嘅分享
影曦五歲時，奶奶經我地同意，買咗一部NDS畀影曦做生日禮物
當時三歲半嘅靖翹，好想試玩，但係我地話佢太細，同埋部機係佢嘅，無畀佢玩
我地同佢講，到佢五歲時，佢就可以擁有自己嘅一部NDS!
就係因為咁，佢無再問幾時可以玩，每次影曦玩時，靖翹都會問影曦佢可唔可以睇
有時影曦話得，有時話唔得...等等等等等...而家佢足足等咗年半啦！
下個月就係佢５歲生日，到時我奶奶就會遵守諾言，買一部靖翹想要咗好耐嘅NDS畀佢！
年半嘅期待，令佢好興𡚒！唔好似為佢好慘，要等咁耐先可以有，佢覺得自己好好彩㗎！
上次我問佢，你就快生日，我地可以去買DS畀佢啦！
佢係開心到彈起，歡喜若狂咁尖叫咗聲~
佢話想要白色嘅NDS，仲要貼上獨角獸嘅貼紙！
呢種期待，令佢更珍惜自己擁有嘅，亦學會專重別人嘅物件
通常喺我地屋企嘅野，佢地都會分享玩具，但只有幾樣係佢地嘅special item（好似影曦嘅nds咁），佢就唔洗分享
分享係好，但係佢地始終係三個個體
每人擁有自己特別嘅野，令佢地覺得自己與別不同：）