一湊三之時間管理(轉左時間表)

呢幾日同舒韻轉左時間表,日頭只係訓一次。
平日9點送兩個大嘅返學，12點湊靖翹放學，3點湊影曦放學，所以舒韻嘅小睡時間要夾到喺呢D時間中間。
剛開學時舒韻係9點半瞓到11點半（呢個係我以前打BLOG上網嘅C人時間，而家被舒韻佔有咗啦！），1點半瞓到2點半
但11月尾佢開始唔係好想點半上床...有試過2點半先瞓著-.-攪到只係瞓咗幾個字就要叫佢起身！
後來食完晏後直頭唔畀佢瞓，但到5點食飯時就好眼瞓...唔係好肯食，結果有好幾日佢5點半就上床，瞓到第二朝！
跟住我就試湊完影曦放學後放佢瞓一個鐘（4點至5點），但係7點又上床囉...佢肯瞓架，但硬係覺得安排唔夠好。
聖誕假時我故意將佢嘅朝早小睡時間推遲。初初佢一到十點幾十一點就好眼瞓，但係過咗幾日，就推延咗佢嘅小睡時間至十二點左右。而家兩個女都返晒學，可以實行下...
我自己好滿意，因為有一對一嘅時間對住三個女:)
時間表如下...

9點 送晒兩個大既返學就同舒韻一對一咁玩

10點半 同舒韻一齊煮飯

11點 舒韻食晏，之後去湊12點放學嘅靖翹

12點半 一返到屋企即放舒韻訓,我就可以同靖翹一對一咁食晏同玩個幾鐘

2點半 舒韻醒左畀生果佢食就去湊影曦

3點半 返到屋企就SKYPE我老公，三條Q一齊玩

有時會畀影曦夜少少訓,等我同佢都可以有一對一既時間。

我好珍惜呢d時間,呢d時間係無價架!可以同小朋友一對一咁相處，令到佢地得到你所有嘅注意力，你會見到小朋友最純真嘅一面。佢嘅世界只有你，你嘅世界只有佢，呢種感覺，真係好窩心:)

細b出世前對大b嘅心理輔導

靖翹出世前我地同影曦做咗好多心理輔導

同佢洗晒腦，因為怕影曦會妒忌靖翹

我見過有小朋友因為細妹／細佬出世，覺得自己被冷落

喺無人見到時會meet細佬妹！攪到佢地喊同瘀咗一撻撻！

好彩我９９好有經驗，教咗我好多野，令到影曦好錫靖翹！
http://www.amazon.com/s/ref=nb_ss_b?url=node%3D4&field-keywords=new+baby&x=0&y=0
呢個網頁嘅第三，四本書，當年我都有喺圖書館惜過返去畀大女睇

waiting for baby有講媽咪有咗bb，媽咪嘅生理變化
例如媽咪體重上升，有時要見下e生，check血壓，個肚會愈嚟愈大呀咁。

my new baby有講做大哥哥有d咩可以幫到手咁
細b出世前畀大嗰個知道將會發生咩事，咁就會好d，佢地會有心理準備
另外，喺我細女出世前，我９９買咗架我大女好鐘意嘅玩具車畀佢，到細女出世時，就話架車係妹妹畀佢嘅禮物，令大女對妹妹有好嘅印象。同時間，因為佢掛住玩架車，而少咗留意我要花好多時間喺妹妹身上。
因為嗰時我餵人奶，一個睇住兩個。為免大女喺我餵緊奶時爬上我到，每次餵奶前我都準備咗：電視同dvd搖控，佢鐘意嘅書放喺我側邊，佢架車喺電視面前，佢嘅小食，佢鐘意嘅玩具。佢一話要我抱，我就畀第二樣野佢，一路keep her away，我就可以安心餵奶。久而久知佢就知道我餵奶時佢唔可以要我抱，佢會等到我餵完先走過我問我可唔可以抱佢。

仲有就係喺細b出世前後，你嘅生活唔好有太大改變（e.g.唔好突然要大嗰個返學，可能佢地會覺得我地專登送走佢！）亦唔好呢個時候potty train，因為佢會以為因為細b嘅出現，佢先會有咁嘅改變。一時間變得太多會令小朋友難以接受，產生情緒問題。

如果喺細b出世後，大嗰個突然啜手指／懶尿，都千其唔好鬧佢。因為可能佢都係想引你注意啫！只要你畀佢知道，父母仲係好關懷佢，好錫佢，仲會同佢一齊做細b出世以前會做嘅事（如一齊去公園玩），等佢得到full attention,呢d情況就會慢慢改善。

好似我地咁，本來都想當年１９個月大仲瞓緊bb床嘅影曦讓張床出嚟畀細妹嘅。但係基於我地都唔想將佢嘅野突然畀咗細妹，我地就買咗個moses basket畀靖翹瞓。靖翹瞓到６個月時我地先慢慢轉張兒童床畀影曦，靖翹就可以瞓bb床啦。

湊兩個小朋友，一大，一初生嘅時間表

到我較到細女嘅routine係４個鐘一次餵一次奶，每晚都係瞓１２個鐘，全日嘅routine係咁
07.00　餵細女食人奶
07.30　叫大女起身，同佢兩個換衫
08.00　食早餐（細女夠大時就食米糊）
10.00　細女早睡，可以同大女一對一咁玩
11.00　餵細女食奶
12.00　食午餐（細女一齊食﹣食咩就睇佢幾大啦）
13.00　放大女瞓覺，同細女一對一咁玩一個鐘
14.00　放細女瞓覺，我就做下家務，煮定飯／瞓下晏覺）
15.00　叫晒兩個女起身，一齊睇電視，我就一路餵細女食奶
17.00　食晚飯
18.00　沖涼
19.00　餵細女食奶，放瞓覺