有幸被邀，率先去咗海洋公園玩哈囉喂「全日祭」
唔好以為好恐佈喎~好多野都啱小朋友玩㗎！
我地先去咗睇「南瓜怪傑工作室」，內裡有唔同嘅南瓜雕刻，啲表情好生鬼，好得意㗎！連舒韻都喺到扮啲南瓜樣lol
南瓜怪傑工作室
喺海洋列車對出
內裡有好多南瓜雕刻家嘅作品，好精彩㗎
（一啲都唔恐怖，可以同小朋友去睇！）
門外有好多dress up咗嘅entertainers 同大家玩
雕刻工具
鬼斧神工~係咪好靚呢~
認得呢個係邊個嗎？係盛志文呀！
場內不乏影相位
有波波玩~（我細個好恨有個咁嘅波！但亞媽唔肯買...但確實又真係無咩用嘅）
場內都有唔同嘅演藝人員同大家影相，增加氣氛
好大個南瓜呀！
沒有最大，只有更大！一千磅嘅南瓜！！！
（你睇靖翹個驚嚇樣！又幾識做戲喎！wahahahaha！）
呢三個南瓜咁排又幾得意喎
有手腳嘅南瓜
（有個揸緊車lol)
Impressive pumpkin carving
好重呀！
Piers, the pumpkin king!
Echo勁好笑，係咁扮pumpkin啲樣！
周街都有人dress up!
舒韻唔敢影喎
同兩少男~Jacob同Tobia同照
之後我地去咗威威天地嘅「古靈精怪魔法屋」，裡面有唔同嘅擺設，好似哈哈鏡、南瓜、糖果...等，仲有好多著得好靚嘅哥哥姐姐攪氣氛同你影相，好啱小朋友玩㗎！
同Daisy 姐姐玩遊戲
玩完daisy 姐姐大派M&Ms
喺古靈精怪魔法屋內有哈哈鏡~立即瘦！勁過減肥藥！
我又想要一塊喺屋企！
屋內有好多地方畀小朋友走來走去、爬來爬去
連影曦都啱玩
所有演藝人員嘅服飾同裝扮都好細緻！
成班嘩鬼賣攪鬼，不賣恐怖！
好多個影曦呀！
不稱職的小羞lol
又嚟個大合照！
跟住我地又去咗玩攤位
獎品全部換晒南瓜啦！有大有細~
七個小朋友人齊掉！
好彩我企得遠，如果唔係實畀佢地掉親！
Tobia好叻，連中兩元！
沿途見到啲車仔檔，都花咗好多心思去裝飾
呢到成個吹氣棺材裝晒野飲㗎！
然後我地去咗海龍王餐廳試食萬聖節菜式
點知呢幾個人一去到扮喪屍！
今次海洋公園安排超好，畀咗最靚嘅房畀我地，對住水族館~
覺得自己係貴賓hehe
「全日祭兒童套餐」餐都別具心思，「搗蛋先生沙律」、「魔咒意粉」同「綠色巫師」（綠茶朱古力慕絲<-呢個好味！我食晒hehe）。
Very chocolaty! 大愛！
啲cupcake又靚又好味！（都幾大個！小朋友未必食得晒一個）
我地仲點咗其他野食
個龍蝦湯同龍蝦炒飯都好好味！！！
遇啱餵魔鬼魚時間
潛水員著住骷髏骨頭潛水衣、攞住個南瓜籃落水添！
佢仲游過嚟同我地打招呼、畀我地睇下魔鬼魚食嘅魚仔添！
我就係鍾意呢啲驚喜，海洋公園做得好好:-)
食完野，我地行咗去[夢幻水都]玩咗啲攤位。除咗有Halloween 飾物賣外，仲有鬼頭鬼臉化妝室（face painting）,同埋「小鬼頭飾手作坊」。影曦同靖翹畫咗隻蝙蝠喺塊面到，舒韻畫咗條魚~
影曦同靖翹都做咗手作，一個整咗個音樂盒，另一個裝飾咗個蛋糕。
真係玩得好開心~好攰嘅一日呢！
坐定定畫面
我同PR姐姐攞起頭飾玩自拍~呵呵呵！
舒韻...豬韻...
呀唔係，係魚韻先啱
魚！（係佢自己揀㗎！）
佢兩個都好鍾意整手工㗎
（舒韻都想整，但無時間Lu~）
一個整咗音樂盒連鯨魚，一個紫色兔仔蛋糕
玩完大合照~開心的一天<3
咪住，都係玩多陣先
去咗搭海洋列車上山，動畫都變晒南瓜樣呢！
只得影曦夠高，老公帶咗影曦玩呢個...
我同靖翹加舒韻負責射濕佢地！哈哈哈！
老公仲帶咗影曦同靖翹玩過山車
呢個靖翹都夠高
舒韻都話想玩...唔好啦掛...好彩佢未夠高啫！
靖翹好大膽！舉起雙手都得！
影曦個樣就好滕雞hahaha!
之後，我聽PR姐姐講，話m&m鬼屋都啱細路玩
我就叫咗老公帶佢地去玩
跟住...中晒伏！！！影曦一入到去已嚇到喊T.T
好彩係優先場，人唔太多，啲演藝人員一知道係細路，之後嗰啲都無再出嚟嚇佢地
出到嚟影曦收晒聲，靖翹就無喊
但問佢地會唔會再入去玩，佢地都異口同聲話唔會再入啦！
（斃！製造咗童年陰影添！）
喺海洋公園，萬聖節裝飾周圍都係！好有氣氛！真係做到一絲不苟！
我地玩到超攰！滿載而歸呢！
最後...當然係打的返屋企
***海洋公園打的小貼士
海洋公園外嘅的士隊超長龍㗎！
如果唔想等咁耐，可以行去出口右手邊停車場嗰邊嘅旅遊巴出入口，喺嗰到截的士好快有車呢！
海洋公園哈囉喂「全日祭」十月一號正式開始！有更多野啱小朋友玩~
好似「趣怪南瓜雕刻樂」工作坊、「哈囉喂趣怪杯子蛋糕工作坊」、逢星期六、日有「南瓜扮嘢王大賽」，一定更好玩！
海洋公園 哈囉喂 全日祭 2013
http://halloween.oceanpark.com.hk/tc/
No comments:
Post a Comment