虎年起身第一件做嘅事﹣準備入院

舒韻真識揀時間...

虎年起身做嘅第一件事，居然係執野準備入院！

我就走啦bye bye！

祝各位新年快樂，希望舒韻唔好要我喺醫院留咁耐~快d攪掂畀我返屋企過年！

辦年貨40w5d

整裝待發！
Kerry今日帶咗兩個女出街
你睇下佢兩個帶咗幾多野@.@

影曦同靖翹一人帶咗一個barbie

靖翹仲帶咗成個back pack 咁多玩具添！

我去咗邊？

我hea咗一朝就同老公去咗河合居食壽司BUFFET

我成到好飽呀！到而家都食唔落野！！！

一上磅，仲見到自己第一次過咗150磅呢！

之後老公出咗灣仔，佢又想戰場啦

我本來想去逸東嗰邊個街市辨年貨嘅

但係太飽...唔想去咁遠

所以近近地去咗富東到買咗幾串銀柳，糯米粉、澄麵之類嘅野"蒸糕餅"

街市竟然無咩賀年糖果賣，所以我去咗taste到買就算啦

但估唔到自己買咗咁多野...

好重呀...

張個人八達通又畀咗Kerry,我搭唔到shuttle bus返屋企喎

我要攞住一堆野行返屋企

今日唔知點解特別攰

攰到我要喺PCC出面坐咗半個鐘先可以繼續行呢！

平時我帶住兩個女又唔見我會咁㗎喎，自己一個就無晒「力量」

可能佢地真係我嘅「力量來源」啦！

不過日頭無兩個女喺身邊嘅時候真係好唔慣

太自在啦！去邊都得...但我估我都係prefer佢地喺我身邊彈嚟彈去呢！

最後一次去健康院產檢40w4d

老公同Kerry(老公嘅４家姐)都喺尋日放咗假啦

因為Kerry住得遠，所以佢而家搬埋嚟我地屋企暫住，等我要入院時就可以即刻入~

佢會幫我睇住兩個女

今朝我又要去健康院

老公第一次陪我去

Kerry喺屋企睇住兩個女

今日去健康院超快攪掂呢！

check完基本野就去見e生，半個鐘就走得！

老公真好彩！唔洗喺嗰到陪我咁耐

e生話Echo而家2/5 engaged咋

可能都仲要等下...

我會喺瑪嘉烈生，佢地嘅policy係，如果過咗edd 10日就會催生

e生幫我book咗17號年初四入院

即係至少我知...Echo最遲17/18號會出世啦

都好，起碼有d野畀我倒數下！

仲有6日咋

不過...我當然希望佢早d出嚟啦！

再遲d，我唔知佢有幾大份呀...生都生c我！

直到而家為止，我已經食咗超辣咖喱（老公泡制嘅...我嘅感覺係我畀人玩緊-.-）

佢加咗極辣嘅辣椒仔辣汁，peri-peri sauce 同６隻辣椒

食咗６００ml綠豆沙

食咗波蘿

成日行樓梯（仲有跑添！）

不過都係無用...

而家唯有順應天意啦~

自己畫肚（40w3d）

畫完兩個女，多手畫埋自己個肚~

不過真係幾難畫！

因為我睇唔到肚臍以下嘅地方！

我要用塊鏡照住先畫到-.-

上個生期有43吋半㗎
但呢幾日得返43吋=.=
真奇怪！

我唔係又輕咗呀...唔好呀！

我唔想去健康院見e生！

等（40w2d）

尋晚又有９次有規律嘅陣痛

次次都係隔７﹣９分鐘

以為嚟料啦

我仲去換埋衫添

點知一起身攞兩塊多士食...又停咗-.-

唉...又有排等啦！

今晚趁有時間，趕返呢個星期嘅日記先~

改咗名啦!

今日就係2月７日，我嘅預產期

好平靜嘅一晚

乜動靜都無

今晚同老公又傾改名嘅事

老公唔識中文
所以我地有個system去改

我先係列咗我鐘意嘅中文字
再以平仄分開呢堆字
廣東話一共有九個音
第一同第四個音係仄，其他嘅係平
我查晒所有字嘅解釋先
老公就喺平音嘅字同仄音嘅字堆內各揀一個字（佢會鐘意個meaning嘅~）
之後再合埋一齊

好似大女叫影曦
細女叫靖翹
個名都係一平一仄嘅
咁個名會響d

而廣東話嘅第一聲尤其響亮
所以...我影曦個名響過靖翹嘅名~

而Echo...我地都諗咗好耐

之前諗過叫"寧優"

但後來個個聽到都話"幽靈"

因為唔想佢畀人笑，所以要改過

我自己都幾鐘意"優媃"

但係老公未聽完我解釋就己經話唔好...

講講下...終於改咗名

Echo嘅全名係：

Echo Syu Wan Darkins 舒韻!

Echo中文係回音

咁個「韻」字係解harmony of sound; refined; elegant

咁舒韻就係解好悅耳，令人聽得好舒服嘅音韻^.^

各位...唔好意思...

False alarm!!!

我尋晚都以為係真嘅...

因為真係痛到唔想郁，講唔到野嗰隻！

記得我上胎生前都試過係咁

個midwife嚟咗check...佢話係有開咗...

嗰次我用咗一個星期嚟開咗三度囉-.-

可能尋晚又係咁，開咗少少咁啦...

睇嚟都係要慢慢等下㗎啦...

要各位擔心，唔好意思呀！！！

陣痛中

懷疑緊係咪真係嚟料...

計緊時...

懷孕39周的我

不知不覺，咁就到咗第三十九周啦
就快可以見到Echo啦
今次係我第三次懷孕
但係對比起之前兩次，今次真係舒服好多呢！

我係好好彩嗰堆，我有咗三胎都只係嘔過一次（仲要係無啦啦烏低身就嘔咗出嚟，無作嘔嘅感覺，嗰時仲未知自己有咗！）
記得陀住影曦時，三十幾週時佢擲住咗我右邊坐骨神經，攪到我行動果難兩個星期！！！
腰酸背痛咗好耐
成日行都要就住就住...

至於陀靖翹呢？
陀佢時３５周因下腹有不明痛楚，一個星期入咗兩次院，住咗兩晚
起初以為係尿道炎
但係check咗又唔係喎
到而家都係原因不明嘅...當時e生開咗antibiotics 我食就算~咁就無時
嗰時又係有少少寸步難行

今胎？
就算而家雖然個肚大過陀靖翹時２吋（但重量一樣）
但係仲係行得走得跑得
雖然自己已經有９個月啦，但係感覺唔似９個月
我仲可以帶住兩個女周圍去
仲有精神過之前添！
我陀呢胎同之前嗰兩次有咩唔同？
今胎我晚晚臨瞓前都有做yoga
其實懷孕初期我都有坐骨神經痛㗎
但係做yoga拉一拉返就完全無事~
效果真係好神奇^.^
我晚晚仲要瞓得好好添喎
晚晚都可以一覺瞓天光~
見到有d準媽咪一晚會起５﹣６次身...我真係想像唔到如果我一晚要醒咁多次我會點...仲要睇住兩個女，肯定變人乾！

做咗yoga我成個人都鬆晒~
我大力推介畀大家~

38w5d - belly painting

唔該晒欣欣同Teddy專程嚟幫我belly paint~我好鐘意，效果好好！！！

係一個好好嘅經驗！
佢地畫得好靚呀^.^

開始畫啦~

畫咗一半~好似係托盤咁呀！

要抺咗佢

勁唔捨得>.<

facebook呢到仲有好多花桇相~

http://www.facebook.com/album.php?aid=181759&id=654084318&l=55bc83b117

37w

話咁快就３７w啦

我之前好幾個星期都係3９吋
呢幾個星期好似一個星期+半吋至一吋咁
而家４３吋啦@.@（但著咗衫後唔覺...仲成日畀街外人話我個肚細-.-）

我而家咁望落去都覺得自己個肚好大

但係前兩日見到我媽，佢仲問我個肚咁細嘅...

今日喺會所又係喎，有人問我幾多個月，我話８個，佢話望落好細，唔似８個月喎...

梗係啦，個個見住我都係著咗衫，梗係唔覺我個肚大㗎@.@
不過我都仲係好"輕盈"

我仲可以跑到，可以追到兩個女（跳就咪攪我啦...）

而且又無腳腫~仲係見步如飛~真係好彩~~~

36w

呢幾張係老公影嘅

而家個肚有４２吋啦
３６w

都唔係重咗好多咋

比之前重咗１７磅左右

個肚又好似無大過咁喎

但係度落去又真係大咗㗎喎...好奇怪！

上星期３５w３d時

全日個下腹係咁痛

但又唔係陣痛喎

湊完影曦返學都仲係咁痛

返咗屋企攤咗兩個鐘都係無改善@.@

直到兩個女瞓咗，我一早lur咗上床瞓

第二朝先至唔痛咋！

我估個baby Echo engage咗，落咗去...

我摸到佢個頭真係好似落咗去咁！

睇下今個星期四去健康院check 時確定下係咪啦~

影曦+靖翹準備做家姐

呢排，我都成日同佢地睇New baby呢本故仔書

目的係要佢地記得，Echo出世後會發生咩事，等佢地有心理準備^.^

佢兩個成日都話要give baby Echo a cuddle!好鬼sweet~

影曦日日返學前都要錫下細妹先返學呢！

影曦成日喺到話:when baby Echo is born, I'll have 2 little sisters. I'll let her sit in the pushchair and I'll walk. I'll look after them. 

聽完之後好感動，但又覺得，我好似畀緊無形嘅壓力佢，要佢長大，要佢照顧兩個妹妹咁...佢有責任感係好嘅，但係都唔想放太大嘅擔子喺佢身上...

希望到時我可以平衡到兩者啦！

呢兩個星期個肚有墮...無之前咁靈活啦

前兩日個下腹仲好痛，痛咗成日！

要到到夜晚兩個女瞓咗我先可以上床休息

好彩第二朝無晒事~

我估Echo engage咗啦

我重唔係重咗好多

到而家都只係重咗17磅左右

但係個肚己經４２吋啦

食食下飯...
兩個係咁話要咀Echo...

影曦話要幫baby Echo影相喎~

Soha Studio_2

影咗d大肚照

但係我覺得效果一般

d衫？

唔係我揀㗎...

佢畀咩我我就著咩，所以有d-.-

不過講真，我都真係第一次影大肚相咋！

被隔離的三天﹣確診豬流感

陀住第三胎，今次都難免要"提早入院"

今次係因為我被確診豬流感而要留院觀察

其實入院時我已經好得七七八八，但e生話曾經有人好緊，但突然有肺炎而病情惡化

所以要求我留e

喺隔離病房，活動地方只可以喺房內

完全唔可以出去

平日最消秏體力嘅動作，就係沖涼！

日日夜夜喺到睇無線

加埋仲睇得多過我半年睇無線嘅時間！（我平時好少睇無線）

一係就食，一係就瞓

次次到食飯時都唔係妳想食，因為無咩郁過...上餐都未落格！

呢幾日都係由老公睇住兩個女

其實今次係老公傳染我嘅

老公都去睇埋e生，攞咗成個星期假嚟睇住兩個女
而大女因此亦唔返得學
老公終於體驗到我一腳踢嘅生活啦！
雖然佢有出貓...攞咗d衫去洗e鋪，都過都總算捱過咗

大女前兩日都有D燒

好彩好快退咗咋

今次都辛苦晒老公啦！

THANK YOU PIERS!!!

時序：
星期六開始發燒
一路食paracetamol 都無退過燒
痛好重
全身肌肉關節酸痛
星期日下午想喺東涌睇e生
但係d好唔專要嘅姑娘以"而家full咗，因為E生要準時走，所以睇唔到你"
大肚７個月，燒咗廿幾個鐘，都算係急症呀！
因為個E生要準時走而唔睇急症...e德何在...
自己一個人仆咗去瑪嘉烈急症室
佢地好好！我以為要等３個鐘，點知我打晒尖，５０分鐘內睇晒e生，攞埋葯，攞埋sample驗豬流感
燒到星期日凌晨５點，終於退燒
星期二晚瑪嘉烈急症室打嚟話我確診豬流感，想我返一返e院
我問佢洗唔洗入院
佢話或者唔洗...
點知一住就住咗３日啦-.-

著咗e院嘅衫
我即刻無咗個肚
（e院個亞嬸每朝都強調：你都唔知加大碼嘅衫幾難搵呀！）

我張床

懶人床一張

有咩噤個制就可以斜起

唔洗起身

有電視睇

景觀一流
有海景
見到如心廣場同IFC+中環㗎
兩個人一間房

兩層等大玻璃門

用自動感應制開門㗎
（左邊嗰個白／藍色制呀）

獨立廁所
超乾淨！！！
所有野都好新
全部都閃令令嘅

所以制都係自動感應嘅
不過個水嚨頭食日就係因為自動感應，感應到d水，所以閂唔到水喉！

２４／７都要戴住喺左手
有嘟嘟碼㗎
好潮呢！

我日日都要吸既藥

探病時間...5.30pm-7.30pm
以為親人可以入嚟...點知我亞媽上到去，畀人趕返落去

視像-.-探訪
只可以傾半個鐘

我的早餐
前日食甜麥皮+餐麭最正
尋曰同今曰碗粥都無味既-.-

午餐同晚餐就係食d咁嘅野啦

好動的Echo

喺隔離病房無野做...
所以影咗好幾段呢d片
呢段Echo都唔算郁得多啦...

一湊三嘅時間分配

Echo出世後我嘅生活會點？

真係要諗諗諗d時間點分配先

我向來都係餵人奶，所以都唔洗旨意老公可以幫到d咩

我一向都係按時餵食嘅

咁分配時間方面會易好多
同埋bb會快d戒到夜奶
一出世會每日上下午７點／１０點／１點／４點餵
一共８次
咁餵完朝早點嗰餐就可以攪掂影曦返學d野
送咗影曦返學後就同靖翹去會所／公園玩
１０點嗰餐就會喺嗰到餵
餵完去買餸
１２點接咗影曦送學後就返屋企煮飯，兩個女１點食飯時我就可以餵Echo
點半就放細女瞓覺
之後就準備晚餐
３點叫醒靖翹（不過呢排佢戒緊晏覺，可能到時佢都己經戒咗囉）
４點餵Echo
餵完煮埋餐飯
５點開飯
６點同大嗰兩個沖涼

７點佢地兩個上床後我就可以餵Echo啦
之後嗰d...咪１０點／１點／４點餵囉
通常一點我都未瞓嘅
咁我都只係半夜起一次身（４點）啫

到約兩個星期後，細b就會慣咗每三個鐘食一次嘅pattern
就轉三個半鐘嘅routine
6點半／１０點／１點半／５點／８點半／１２點（半夜就喊食先餵，睇下可唔可以戒夜奶，就算唔得，都只係起一次身）

到Echo 4/5星期大左右，就轉４個鐘routine（睇下Echo慣咗３個半鐘嘅routine未啦）
到時就６點／１０點／２點／６點／１０點餵
到到Echo慣咗呢個routine,戒咗夜奶，就慢慢將１０點嗰餐推前
直至令到佢可以由６點瞓到６點為止

我之前兩個女係７點瞓到７點嘅，一日四餐（７點／１１點／３點／７點），直到４個月就開始畀糊仔
佢兩個而家都係由７點瞓到７點
但如Echo７點先起身，攪大女返學就會好趕
１１點餵第二餐嘅話我又要好趕咁去接大女放學
總之d時間就唔係好啱用啦
所以先諗住要６點到６點嘅routine

希望成功啦！！！

26w

26W

啱啱過咗39吋

而家日日都要用托腹帶

如果唔係好唔自在-.-

個肚係好多肚紋

但係我好鐘意

係我bb送畀我嘅禮物^.^

23w5d

話咁快就23w啦

呢胎都無驚無險（暫時hehe）

個肚真係大得快

而家己經38.5吋啦！

重就無乜點重過

因為上個星期我有氣管敏感

咳到我cc下

仲嘔咗幾次添！（陀咗咁多次b都無嘔過，徧徧因為咁而咳到嘔XP）

攪到我無晒胃口

返到健康院仲畀姑娘哦我...話我輕咗...

又唔聽我解釋喎

send 咗我去見e生-.-

好彩個e生明白事理，仲叫我唔洗擔心，個BBsize啱啱好！

我好耐都無抱過兩個女囉

佢地都好乖知道我而家唔可以抱佢地，佢地都好生性^.^

仲幫我手做好多濕碎野~真係好！

第三次懷孕

睇得discovery home & health多

攪到我今次唔想知bb性別呢

我想到bb出世時有驚喜^.^

不過老公就好心急想知~

呢胎個肚大得特別快

可能因為第三胎啦

15w4d開始BB就日日踢我啦

18w4d個肚己經37吋

希望呢個b唔好太大啦

如果唔係，會生得好辛苦㗎...

佢兩個成日走埋嚟錫我個肚（有時仲要喺公眾地方拎起我條裙嚟錫...畀人睇晒我條底底-.-）
佢兩個每晚臨瞓前都會kiss baby night night 同 give baby a cuddle先瞓㗎~