Q:如何令3位女兒相處融洽,學懂分享,禮讓,體諒...爭玩具時你會如何處理??
A:
如何令3位女兒相處融洽,學懂分享,禮讓,體諒...爭玩具時你會如何處理?? !!
先講爭玩具->如果佢地爭,我會攞走樣玩具,兩個都無得玩.呢個係佢地兩個都知嘅規則,所以呢個情況發生唔多(呢個方法係我老公教㗎)初初我地實行時,佢地兩個都會喊住話要樣玩具,又話我玩緊先,邊個又放咗喺到唔係玩緊...不過我照樣唔理佢由佢地喊,或者囉其他吸引D嘅玩具出嚟引開佢地注意力,好快佢地就唔記得咗.慣咗呢條規則後,佢地就少爭野咗啦,就算爭,我攞開件玩具,佢地都會好順攤由得我
相處融洽...->好多時都係睇我地大人點同其他人相處同埋我地點同小朋友講野.
喺我個BLOG到有篇"小B出世對B大嘅心理輔導",裡面提到對小朋友講野要小心.呢個就係重點.你有無聽過人同小朋友講"你唔乖嘅我錫晒細佬唔錫你㗎啦!","你再曳我唔要你!你睇下細佬幾乖!"...等等嘅句字呢?
呢D都係絶對唔可以喺小朋友面前講嘅說話!就係大人嘅呢D說話,直接影響到大嘅小朋友對細佬/細妹有住負面嘅想法.佢地會𡛳忌細佬妹,覺得細佬妹搶咗佢以前有嘅地位,變得唔鐘意佢地.
要小朋友相處融洽,我覺得最根本嘅問題就係喺我地大人到
你要同佢講D好似咁嘅野...
"細妹佬妹出世,代唔代表媽咪同嗲D錫少咗你一半呀?唔會㗎喎,咁只會代表世界上會多咗一個人愛你,媽咪同嗲D仍然係咁愛你㗎!"
佢唔乖時,同佢講"你乖D,畀細佬妹睇下你點乖.你係大哥/大姐,佢地會想學你,好似你咁乖㗎!"佢真係乖,記住勁讚!
學懂分享->可以以細佬妹之名買佢地鐘意食嘅野,話係細佬妹同佢分享,咁佢地就會知道分享係咩.到佢倒轉頭話要同細佬妹分享時,又要勁讚呀!
禮->好多時小朋友都係喺大人到學返嚟:)大人講野唔係咁大聲,唔好喺小朋友面前鬧交等等...仲有時不時提佢地要講唔該,佢地記得講時又勁讚,佢地會好快學識
讓->我唔會叫大讓細.佢地玩嘅機會係平等嘅.不過如果其中一方想玩另一個玩緊嘅玩具,我要佢地等.等人地玩完,就輪到佢,通想常佢地都會樂意等.如果佢地唔想等,可以攞佢地野引開佢地注意力:)
體諒->比喻比喻&比喻!用淺易嘅比喻令佢地明.佢地大大下就會明白更多:)
